Ońtústik Qazaqstan oblysynyń ákimi Janseiit Túimebaev óńirde ótken bokstan respýblikalyq birinshilik aiasynda sport sańlaqtarymen kezdesti. Olardyń qatarynda QR Boks federatsiiasynyń vitse-prezidenti Iýrii Tshai, Bokstan Qazaqstan ulttyq quramasynyń bas bapkeri Myrzaǵali Aitjanov, QR Eńbegi sińgen sport sheberleri ári Olimpiada chempiondary Serik Sápiev jáne Baqtiiar Artaev, sondai-aq Daniiar Eleýsinov, bokstan álem chempiondary Birjan Jaqypov pen Qairat Eralievter bar, dep habarlaidy Ońtústik Qazaqstan oblysy ákimdiginiń baspasóz qyzmeti.
Kezdesýde oblys basshysy arnaiy kelgen qonaqtarǵa alǵys bildirip, bir mezette úsh birdei Olimpiada chempionynyń óńirge alǵash ret kelip jatqandyǵyn atap ótti. Sonymen qatar, oblys ákimi óńirdiń sport salasy qarqyndy damyp kele jatqandyǵyn aitty.
«Elbasymyz «Sport - eldiń mereiin asyryp, abyroiyn asqaqtatyn sala. Bul turǵyda sportshylarymyz kók týymyzdy jelbiretip keledi» degen bolatyn. Ońtústikke Serik Qonaqbaevtai maqtanyshymyzdy baptaǵan Iýrii Andreevichtiń, budan bólek Olimpiada chempiondarynyń kelgeni abyroi. Biz oblysymyzda sportqa erekshe mán berýdemiz. Aita keterligi, bizdiń óńirde 43 sport mektebi bar. Eldiń abyroiyn kóterý úshin sportshylarymyzǵa barlyq jaǵdaidy jasaýymyz kerek», - dedi Janseiit Qanseiituly.
Óz kezeginde sóz alǵan ulttyq quramanyń bas bapkeri Myrzaǵali Aitjanov oblysymyzdyń sporty qarqyndy damyp jatqandyǵyn, onyń ishinde bokstyń joǵary deńgeide ekendigin atap ótti.
«Bokstan bizdiń óńirde biyl ekinshi álem chempiony shyqty. Ulttyq quramada bizdiń sportshylar kóp. Aldaǵy Olimpiadada ońtústik óńirinen chempion shyǵatynyna senemin. Sol úshin jumys jasaimyz», - dedi Myrzaǵali Aitjanov.
Kezdesýge kelgen el maqtanyshtary bolashaqta ońtústikke arnaiy kelip, «master klass» ótkizip turatyndaryn jetkizdi. Shara sońynda oblys basshysy qonaqtarǵa tabys tilep, estelik syilyq jasady
