Ońtústik Qazaqstan oblysynda jalpy óńirlik ónim kólemi jyl saiyn artyp keledi. Biylǵy jyldyń birinshi jarty jyldyǵynda oblysta jalpy óńirlik ónim kólemi 1 340,5 mlrd. teńgeni qurap, 2,7 paiyzǵa artty. Bul týraly búgin oblys ákimdiginiń kezekti májilisinde oblystyq ekonomika jáne biýdjettik josparlaý basqarmasynyń basshysy Arman Sábitov málim etti, dep habarlaidy "Ult aqparat" ákimniń baspasóz qyzmetine silteme jasap.
Basqarma basshysy jyl sońynda jalpy óńirlik ónim kólemi 3 014,5 mlrd. teńgeni quraityndyǵyn jetkizdi. Osylaisha Ońtústik Qazaqstan oblysy respýblika kóleminde ósim boiynsha 5- orynǵa turaqtamaq. Al, óńdeý ónerkásibi óniminiń kólemi 410,8 mlrd. teńgeni qurap, 2,1 paiyzǵa artqan. Alaida ónerkásip ónimi boiynsha indikatordyń oryndalmaý qaýipi bar. Jyldyq jospardy qamtamasyz etý úshin ónim kólemin 850 mlrd. teńgege jetkizý qajet. Alaida Shymkent qalasy men Báidibek, Otyrar aýdandarynyń indikatorlary jyldyq jospardan artta qalýda.
«Qazirgi kezeńde sońǵy 9 aida ónerkásip ónim kólemi 605 mlrd. teńgeni quraýy qajet bolatyn. Alaida 9 aidyń qorytyndysymen ónim kólemi 599,2 mlrd. teńgege jetip otyr. Budan bólek, óńirimizde tirkelgen shaǵyn jáne orta kásipkerliktiń áreket etetin nysandarynyń úlesi 83 paiyzdy qurap, indikatordyń oryndalmaý qaýipi bar. Sońǵy 9 aida tirkelgen shaǵyn jáne orta kásipkerlik nysandarynyń sany 213 419 bolsa, olardyń 36 796 áreket etpeidi. Onyń ishinde eń joǵary deńgei Shymkent qalasynda tirkelip otyr. Iaǵni qaladaǵy 21 815 shaǵyn kásipkerlik nysandarynyń jumysy toqtap tur», - dedi Arman Sábituly.
Sondai-aq, qoǵamdyq qaýipsizdikti qamtý maqsatynda ishki ister departamentine biýdjetten bólingen qarjy kólemi jyl saiyn ulǵaiǵanymen salaǵa qatysty birneshe indikatorlardyń oryndalmaýy baiqalady. Atap aitqanda, jasóspirimder jasaǵan qylmystardyń úlesiniń jospary 3,4 paiyz bolsa, naqty 9 aida – 3,5 paiyzdy quraǵan. Ótken jyldyń 9 aiymen salystyrǵanda kórsetkish Shymkentte, Qazyǵurtta, Maqtaralda, Otyrarda, Sairamda, Tólebide, Shardarada, Kentaýda, Túrkistanda ósken.
Jiynda aitylǵan olqylyqtarǵa qanyqqan óńir basshysy aýdan, qala ákimderi men salaǵa jaýapty basshylardyń jumysyn synǵa alyp, birqatar tapsyrmalar júktedi.
«Birqatar aýdan-qalalarda tirkelgenimen áreket etpeitin shaǵyn jáne orta kásipkerlik nysandary kóbeiip otyr. Memleket pen úkimet tarapynan qanshama qoldaýlar kórsetilip otyrǵan kezeńde shaǵyn jáne orta kásipkerlikti turalatýǵa bolmaidy. Máselen, Shymkent, Sozaqta, Tólebide, Túlkibasta shaǵyn jáne orta kásipkerlik nysandarynyń sany azaiǵan. Aýdan, qala basshylarynyń osy rettegi jumystaryna qanaǵattanarlyqsyz degen baǵa berýge bolady. Budan bólek, birqatar aýdan qala ákimdikterinde tek biýdjettik investitsiialarmen shektelip, jeke investitsiia tartý boiynsha jumystar tómen deńgeide júrgizilýde. Jyl sońyna deiin osy olqylyqtardyń ornyn toltyrýdy jáne apta saiyn aqparat berip otyrýdy tapsyramyn », - dedi Janseiit Qanseiituly.
