Búgin Ońtústik Qazaqstan oblysynyń ákimi Janseiit Túimebaev «Halyqaralyq stýdentter kúni» merekesine orai uiymdastyrylǵan oblys jastarynyń baly men «Úzdik jastar premiiasy» saltanatty is-sharasyna qatysty, dep habarlaidy oblystyq ákimdiktiń baspasóz qyzmeti.
Jastardyń arasynda mádeniettilik pen ádeptilikti qalyptastyrý maqsatynda uiymdastyrylǵan keshte oblys ákimi sóz alyp, barsha ońtústikqazaqstandyq stýdent jastardy búgingi merekemen quttyqtap, ystyq lebizin jetkizdi.
«Elimizde qai kezde bolmasyn jastarǵa, jas mamandarǵa úlken senim artylyp, jastardyń ósýine kóptegen jaǵdailar jasalýda. Memleket basshysynyń «Bolashaqqa baǵdar: rýhani jańǵyrý» atty baǵdarlamalyq maqalasy ulttyq rýhaniiattyń jańa tuǵyry desek, ony júzege asyrý bárimizdiń aldymyzda turǵan basty maqsat. Búginde Ulystyń uiytqysy atanǵan - óńirimizdi jan-jaqty damytý jolynda jigerli jastarymyzdyń úlesi bar, áli de kóp eńbek etip, oblystyń damýyna súbeli úles qosatyndaryńyzǵa senimdimin. Sizderge tek eńbekte ǵana emes, Táýelsiz elimizdiń maqtanyshyna ainalyp, barlyq salalarda úlken jetistikterge jetýlerińizge shyn júrekten tilektespin»,-dedi ákim.
Munan bólek, oblys ákimi jyl boiy túrli salalarda ózindik úles qosyp júrgen 20 kóshbasshy jasqa 15 nominatsiia boiynsha «Úzdik jastar premiiasyn» tabystady.
Saltanatty keshte arnaiy daiyndyqtan ótken 22 jup bi keshine arnalǵan saltanatty kiimderin kiip, vena valsyn biledi. Olar bi alańyn naǵyz venalyq ertegi álemine ainaldyrǵandai áser qaldyrdy.
Is-sharaǵa oblystyq máslihat depýtattary, joǵary jáne arnaýly orta oqý oryndarynyń basshylary men belsendi jastar, jumysshy jastar uiymy men erikti jastar jalpy sany 500-den astam adam qatysty.
Sonymen qatar, mereke qarsańynda búgin «Jastar resýrstyq ortalyǵy» ǵimaratynda «Ońtústik» jastar teatrynyń talantty óner ieleri ózbek dramatýrgy H.Hýrsanovtyń «Óldik te, qurmetti boldyq» atty tárbielik máni zor komediialyq janrdaǵy qoiylymyn usyndy.
Aita keteiik, oblystaǵy 12 joǵary oqý ornynda 44 860 stýdent, 91 orta, arnaýly oqý oryndary men kolledjde 70 885 stýdent bilim alady. Iaǵni, óńirde 115 myńnan astam stýdent bar.
