Túrkistan oblysy Jetisai aýdanyndaǵy balalarǵa qatysty turmystyq zorlyq-zombylyq faktileri Bala quqyqtary jónindegi ýákil Sáýle Aitpaeva, QR Bas prokýratýrasy, QR BǴM balalardyń quqyqtaryn qorǵaý komitetiniń baqylaýyna alyndy. Bul týraly Bilim jáne ǵylym ministrliginiń baspasóz qyzmeti habarlady.
11 sáýir kúni D.Qonaev atyndaǵy №9 orta mektebiniń basshylyǵynan Jetisai aýdanynyń quqyq qorǵaý organdary qyzmetkerlerine 6, 7 jáne 9 synyp oqýshylaryna qatysty zańsyz áreketter týraly aqparat kelip túsken. 12 sáýirde júrgizilgen tekseris nátijesinde aýdandyq politsiia bólimi QR Qylmystyq Kodeksiniń 140-baby «Kámeletke tolmaǵan balalardy tárbieleý jónindegi mindetterdi oryndamaý» boiynsha qyzdardyń ákesine qatysty jáne QR Qylmystyq Kodeksiniń 110-baby «Azaptaý» boiynsha qyzdardyń ógei anasyna qatysty qylmystyq is qozǵady.
«Tekserý barysynda ákesiniń birge turatyn áielimen (qyzdardyń ógei anasymen) zańdy nekede tirkelmegeni jáne áieldiń bul qyzdardyń zańdy ókili bolmaǵany anyqtaldy. Tergeý is-sharalary barysynda balalarǵa fizikalyq jáne psihologiialyq zorlyq-zombylyq kórsetý faktileri anyqtaldy. Qazirgi kezde qyzdardyń ógei anasy ýaqytsha ustaý izoliatoryna qamaqqa alynǵan. Kámelet jasqa tolmaǵandardyń densaýlyq jaǵdaiyn eskere kele olardy aýdandyq aýrýhanaǵa jatqyzý týraly sheshim shyǵaryldy. Búgingi tańda balalarmen dárigerler, psiholog jáne psihiatrlar jumys isteýde. Emdeýshi dárigerlerdiń aitýynsha, qyzdardyń qazirgi jaǵdaiy qanaǵattanarlyq. Aýrýhanadan shyqqannan keiin qyzdardyń qaýipsizdigi úshin kámelet jasqa tolmaǵandar isteri jónindegi aýdandyq komissiianyń sheshimimen olar týǵan ájesine jiberiledi. Qyzdardyń týǵan ájesi qazirgi tańda basqa balasynyń otbasymen turady. Sot-meditsinalyq saraptama qorytyndysy jáne istiń basqa materialdaryn daiyndaý nátijeleri boiynsha qyzdardyń ákesi men ógei anasyna qatysty is Iývenaldy sotqa jiberilip, úkim shyǵady» delingen habarlamada.
Balalarǵa qatysty zorlyq-zombylyqty ýaqytyly anyqtaý boiynsha jetkiliksiz jumys jasaǵany úshin aýdan ákiminiń orynbasary, aýdandyq bilim bóliminiń jetekshisi, mektep direktory, mektep direktorynyń tárbie isi jónindegi orynbasary, mektep psihologtary, áleýmettik pedagog jáne 3 synyp jetekshisine qatysty qatań tártiptik jaza qoldanylady.
18 sáýir kúni pedagogtar, ata-analar, densaýlyq saqtaý salasy men ishki ister organdary qyzmetkerleri jáne Jetisai aýdanynyń jurtshylyǵymen ótken kezdesýde balalardyń quqyqtary men zańdy múddelerin qamtamasyz etý suraqtary talqylanyp, kámelet jasqa tolmaǵandarǵa qatysty zorlyq-zombylyqtyń aldyn alý boiynsha júielik sharalar qabyldandy.
