Jeksenbi kúni Odessaǵa áýeden soqqy jasaldy. Sonyń saldarynan áýejaidyń ushý-qoný jolaǵy búlinip, jaramsyz bolyp qalǵan. Bul jóninde Ýkraina qarýly kúshteriniń "Ońtústik" jedel basqarmasy habarlady, dep jazady Azattyq.
Kýágerler birneshe jarylys dybysyn estigen. Zardap shekkender týraly aqparat joq.
Resei qorǵanys ministrligi aqparatqa túsinikteme bermedi.
Bir apta buryn da Odessaǵa zymyranmen soqqy jasalǵan edi. Snariadtardyń biri turǵyn úige túsip, 8 adam qaza bolǵan. Arasynda úsh jasar qyz, anasy men apasy bolǵan.
Resei qorǵanys ministrligi Odessa túbindegi áskeri aerodromǵa soqqy bergenin málimdegen. Biraq turǵyn úige zymyran túsip, beibit turǵyndardyń qaza bolǵany týraly aitpaǵan.
Osyǵan deiin Odessada 1-3 mamyr aralyǵynda komendanttyq saǵat engizilgen edi. Qalada osy ýaqyt aralyǵynda poiyzdar toqtaidy. Temir jol vokzaly jabylady. Mundai sharalar Antimaidan narazylyǵyna bir jyl tolýy qarsańynda engizilip otyr.
2014 jyly 2 mamyrda Odessada Eýromaidan jaqtastary men reseishil belsendiler arasynda qaqtyǵys bolyp, 48 adam qaza bolǵan. 2 mamyrda qala turǵyndary qaza bolǵandardy eske almaq, alaida bilik arandatý áreketi bolýy múmkin dep qaýiptenedi.
24 aqpanda Resei "denatsifikatsiia" jáne "demilitarizatsiia" júrgizemiz degen jeleýmen kórshiles Ýkrainaǵa qarsy soǵys bastaǵan. Resei Ýkrainadaǵy soǵysty "áskeri operatsiia" dep ataidy, ony "soǵys" dep ataǵandardy qatań jazalaidy. BUU-ǵa múshe elderdiń basym bóligi oqiǵany Resei basqynshylyǵy dep atap, Máskeýden áskerin Ýkrainadan alyp ketýdi talap etken. Dálel-aiǵaqtardyń kóptigine qaramastan Resei taraby azamattyq nysandardy atqylaǵanyn moiyndamai keledi.
