Adam ólimine alyp kelgen Odessa kolledjinde bolǵan órtke bailanysty Ýkraina Prezidenti Vladimir Zelenskii 2019 jyldyń 8 jeltoqsanyn qaraly kún dep jariialaý týraly sheshim qabyldady, dep habarlaidy Ýkrinform agenttigi.
«Búkil Ýkrainada aza tutý kúninde: memlekettik organdardyń, jergilikti bilik organdarynyń, memlekettik kásiporyndardyń, mekemeler men uiymdardyń úilerinde jáne ǵimarattarynda Ýkrainanyń Memlekettik Týy túsirilsin; oiyn-saýyq jáne kontserttik sharalardan bas tartylsyn, teledidar men radio baǵdarlamalaryna tiisti ózgerister engizilsin», - delingen Prezident Jarlyǵynda.
Vladimir Zelenskii bul sheshimine Facebook-te pikir qaldyrdy.
«Osy qaiǵyly oqiǵa barlyq sheneýnikter, basshylar, barlyq Ýkraina azamattary úshin sabaq bolsyn. Ómir - árqaisymyzdyń qolymyzda bar eń qundy nárse. Adam ómiri - bul eldiń eń basty qundylyǵy. Olardyń ómirin saqtaý - memlekettiń birinshi kezektegi mindeti. Adamdar maidanda jan qiyp jatsa aýyr deimiz. Al beibit qalada, bireýdiń qatelikteri nemese nemquraidylyq saldarynan adamdardyń qaitys bolýy eki ese aýyr», - dep atap ótti memleket basshysy.
Eske sala keteiik, 4 jeltoqsanda Odessanyń Ekonomika, quqyq jáne qonaq úi men meiramhana biznesi kolledjinde órt boldy. Qazirgi ýaqytta órtten jeti adamnyń qaza tapqany belgili boldy.
