QR DSM Qazaq onkologiia jáne radiologiia ǵylymi-zertteý institýtynyń basqarma tóraiymy Diliara Qaidarova obyrdan emdelýden qoryqpaýǵa shaqyrdy, dep habarlaidy QazAqparat.
«Emdelgenderdiń kóbi óziniń bastan ótkergen problemasyn jariia etýden bas tartady. Bizde ony «jaman aýrý» deidi. Sonymen qatar, bul aýrýǵa shaldyqsa da, óziniń otbasyna aitpaityn adamdar kezdesedi. Adamdar statistikany estigen kezde qaterli isik aýrýyna bailanysty úreileri arta túsedi. Tekserýden barynsha erte ótken jaǵdaida aýrýdy jeńip shyǵý múmkindigi zor. Sondyqtan halyq aýrýdan qoryqpaýy tiis, óitkeni elimizde obyrdan emdelýdiń tiisti múmkindikteri bar», - dedi Qaidarova Onkologiiadaǵy Dúniejúzilik kóshbasshylar sammitinde tilshiler saýalyna jaýap bere otyryp.
Onyń aitýynsha, 180 myń naýqastyń arasynda 90 myńy obyrdan saýyǵyp ketti. Alaida jyl saiynǵy ólim-jitim 15 myńǵa jýyq.
«Tolyqtai saýyǵyp ketkender 52 paiyz deńgeiinde, olar bul aýrýdy jeńip shyqqan adamdar. Emdelýshiler bizde bes jyl jáne odan da artyq merzimde tirkeýde turady », - dedi D. Qaidarova.
Budan buryn habarlanǵandai, búgin elordada Onkologiiadaǵy Dúniejúzilik kóshbasshylar sammitiniń jumysy bastaldy. Sharaǵa 70 elden 350 delegat qatysyp jatyr.
