Almaty oblysynda Elbasynyń tapsyrmasyn jáne el Prezidentiniń Joldaýyndaǵy mindetterin oryndai otyryp, ekonomikalyq ósimge qol jetkizý men halyqtyń ál-aýqatyn arttyrý úshin barlyq qajetti sharalar qabyldanǵan. Sonyń nátijesinde 2019 jyldyń qorytyndysy boiynsha oblystyń jalpy óńirlik ónimi 4,5 paiyzǵa ósip, úsh trillion teńgeden asty. 48 myńnan astam jumys orny quryldy, onyń 31 myńy - turaqty jumys oryndary.
Bul týraly Almaty oblysynyń ákimi Amandyq Batalov búgin Taldyqorǵanda ótken el aldyndaǵy esep berý jiynynda aitty, dep habarlaidy "Ult aqparat".
«Memlekettik biýdjetke túsimder 509 mlrd. teńgeden asty, onyń ishinde tek ózindik kirister 226 mlrd. teńgeni qurady. 2020 jylǵy oblys biýdjeti 586 mlrd.teńgeni qurap, onyń ishinde menshikti kiris 252 mlrd. teńgege jetken. Oblysta injenerlik infraqurylymdarmen qamtý isine jergilikti biýdjettiń 75 %-i jumsalyp otyr. Máselen, jol jóndeýge – 40 mlrd. teńge, sý júielerine – 10,5 mlrd. teńge, gazdandyrýǵa – 3,2 mlrd. teńge, turǵyn úilerdi injenerlik jelilermen qamtýǵa – 32,6 mlrd. teńge, turǵyn úi kommýnaldyq sharýashylyǵyna, sonyń ishinde jylý, elektr júielerimen qamtý, abattandyrý men jaryqtandyrý jumystaryna jalpy kólemi 12 mlrd. teńge qarastyrylyp otyr. Turǵyndardyń ómir súrý sapasyn arttyrýda bul máselelerdi sheshýdiń mańyzy zor», - dep atap ótti A. Batalov.
