Qalyptasqan dástúr boiynsha Almaty oblysynyń ákimi Amandyq Batalov Uly Otan soǵysynyń 75 jyldyǵymen soǵys ardagerlerin quttyqtap, Taldyqorǵan qalasynyń turǵyndary, «Paravoz-apa» atanǵan Altynai Esbolatova men Mihail Baranovtyń úiine bardy, dep habarlaidy "Ult aqparat" óńir basshysynyń baspasóz qyzmetine silteme jasap.
Altynai Esbolatovaǵa Amandyq Batalov aldymen el Prezidenti Qasym-Jomart Toqaevtyń quttyqtaý hatyn oqyp berdi. Quttyqtaý hatta: «Sizdi Uly Otan soǵysyndaǵy Jeńistiń 75 jyldyǵymen shyn júrekten quttyqtaimyn! Sizderdiń adamzat tarihyndaǵy eren erlikterińiz búgingi beibit ómirimizge, jarqyn bolashaǵymyzǵa jol ashty. Bul eshqashan umytylmaidy. Ardagerlerimizdiń dańqty ómir joly - Otanǵa qyzmet etýdiń jáne patriotizmniń ozyq úlgisi, óskeleń urpaq árdaiym ózderińizge qarap boi túzeidi. Sizge zor densaýlyq, amandyq jáne baq-bereke tileimin», - delingen quttyqtaýda.
Merekelik syilyqtar tapsyrǵan Amandyq Batalov:
- Almaty oblysynda 64 soǵys ardageri bar, olardyń qatary jyldan jylǵa azaiyp barady. Olardyń eń kishisiniń jasy 95-ke keldi. Bizdiń mindetimiz – olarǵa qurmet kórsetip, qamqorlyq jasaý. Aýyrmańyz, apa, 100 jasańyz, - dedi oblys ákimi.
Eske salsaq, Altynai Esbolatova 1923 jyly Aqsý aýdany Matai stansasynda týǵan. Uly Otan soǵysynyń alǵashóy jyldarynda paravoz mashinisiniń jedeldetilgen kýrsyn bitirip, ómiriniń sońyna deiin temir jol salasynda eńbek etti. Jaýdyń bombalaǵanyna qaramastan poezdy Germaniiaǵa deiin júrgizip bardy, al kópten kútken jeńisti Frankfýrtte qarsy aldy. Altynai apanyń marapattarynyń ishinde I dárejeli Otan soǵysy ordeni, «Stalingradty qorǵaǵany úshin», «Qyrymdy azat etkeni úshin», «Germaniiany jeńgeni úshin» medaldary jáne basqa da marapattary bar.
Munan keiin Amandyq Batalov soǵys ardageri Mihail Baranovty quttyqtady. Ol 1941 jyly I dárejeli Otan soǵysy ordenimen marapattalǵan.
Amandyq Batalov Prezidenttiń quttyqtaýyn oqyp berip, Mihail Vasilevichke óńirde shyqqan Jetisý ardagerleri týraly kitapty kórsetti:
- Oblystaǵy barlyq ardagerler týraly mynadai kitap shyǵardyq, onyń ishinde siz týraly da maqalalar bar, Mihail Vasilevich. Sizder týraly, Sizderdiń erlikterińiz jaily estelikter bizdiń jadymyzda máńgi saqtalady. Sizder – naǵyz batyrsyzdar, jastarǵa úlgisizder. Densaýlyǵyńyz myqty bolsyn, aman-saý 100 jasqa jetińiz, saýlyǵyńyzdy tileimin, - dedi oblys ákimi.
Óz kezeginde ardager de alǵysyn bildirdi: «Bul bárimiz úshin keremet mereke. Quttyqtap, qurmet kórsetkenderińe rahmet aitamyn», - dedi 97 jastaǵy Mihail Baranov.
Atap ótsek, Almaty oblysynda 64 Uly Otan soǵysynyń ardageri bar, olarǵa 1 mln. teńgeden materialdyq kómek berildi.
