Memlekettik satyp alýlar týraly zańǵa ózgerister engizilgennen keiin oblys ákimderi konkýrstyq komissiia tóraǵasy bola almaidy. Bul týraly QR Qarjy vitse-ministri Rýslan Beketaev aitty, dep habarlaidy "Ult aqparat".
«QR Prezidentiniń memlekettik satyp alýdy ortalyqtandyrý týraly tapsyrmasyna sáikes, saiasi qyzmetshilerdiń memlekettik satyp alýdy ótkizýge aralasýyn qospaǵanda, zań jobasymen konkýrstyq komissiia tóraǵasy retinde ortalyq memlekettik organdardyń birinshi basshylaryn jáne oblys ákimderin anyqtaý týraly talap alynyp tastalady», - dedi ol Májiliste «Memlekettik satyp alý máseleleri boiynsha keibir zańnamalyq aktilerine tolyqtyrýlar men ózgerister engizý týraly» zań jobasyn tanystyrý barysynda.
Vitse-ministrdiń aitýynsha, zań jobasynda redaktsiialyq sipattaǵy ózge de túzetýler men zań tehnikasy bar. Sonymen qatar joǵaryda atalǵan tásildi Úkimet ázirlep, Ony Prezident Ákimshiligi kelisti. Jalpy, zań jobasy boiynsha onyń negizgi erejeleri qoǵammen jan-jaqty talqylandy. Ortalyq jáne soltústik óńirler úshin biznes pen memlekettik organdar arasynda toptyq keńester ótkizildi.
«Osyndai jinalystardy Almaty jáne basqa da qalalarda ótkizý josparlanyp otyr. Bul zań jobasy memlekettik satyp alý salasyn jaqsartady, kásipkerlerdiń qiynshylyqtaryn sheshýge jáne sybailas jemqorlyqty tómendetýge múmkindik beredi dep senemiz», - dedi Rýslan Beketaev.
