Búgin QR Syrtqy ister ministri Muhtar Tileýberdi beinekonferentsiia formatynda «Ortalyq Aziia + Japoniia» dialogy Syrtqy ister ministrleriniń kezekten tys keńesine qatysty, dep habarlaidy "Ult aqparat".
«Atalǵan alań COVID-19 pandemiiasyna qarsy turý aiasynda erekshe mańyzǵa ie bolýda. Keńes barysynda taraptar pandemiiamen kúrestegi tiimdi ózara is-qimyl máselelerine erekshe nazar aýdaryp, onyń óńir ekonomikasy úshin jaǵymsyz saldaryn eńserý jáne syrtqy ekonomikalyq qyzmetti jandandyrý máselerin qarastyrdy. Epidemiologiialyq jaǵdai, bir-birine gýmanitarlyq kómek kórsetý jónindegi óńirlik yntymaqtastyq, azamattardy shet elderden qaitarý máseleleri, sondai-aq ekonomikalyq utqyrlyq pen iskerlik belsendilikti qalpyna keltirý perspektivalary talqylandy», - delingen QR SIM málimetinde.
Qazaqstandyq tarap Japoniia Úkimetine pandemiiaǵa qarsy kúreste jan-jaqty qoldaý kórsetkeni, ozyq tájiribelerdi engizý boiynsha eki eldiń sanitarlyq-epidemiologiialyq qyzmetteriniń ózara is-qimylyn nyǵaitýǵa jáne vaktsina men jańa meditsinalyq preparattardy ázirleý, ǵylymi-praktikalyq kómek kórsetýge ázirligi úshin rizashylyǵyn bildirdi.
«Syrtqy saiasi vedomstvolardyń basshylary osy format sheńberinde ózara saýda-ekonomikalyq is-qimyldy qalpyna keltirýge baǵyttalǵan praktikalyq kúsh-jigerdi biriktirý týraly sheshim qabyldady. Bul aspektide Japoniianyń ekonomikalyq jáne tehnologiialyq áleýeti qyzyǵýshylyq týdyrady. Ony jalpy Ortalyq Aziia ekonomikasyn jańǵyrtýda jáne birlesken jobalardy iske asyrý arqyly qoldanýǵa bolady. Keńeske qatysýshylar syrtqy saiasat vedomstvolary basshylarynyń kelesi 8-shi kezdesýi barysynda Japon biznesiniń qatysýymen saýda, investitsiialar jáne agroónerkásiptik keshen salasynda naqty usynymdar ázirleýge kelisti», - dedi SIM-nen.
Aita keteiik, «Ortalyq Aziia + Japoniia» dialogy Japoniianyń bastamasymen shaqyrylǵan. Alǵashqy kezdesý 2004 jyly Nur-Sultanda ótti. Format sheńberindegi yntymaqtastyqtyń negizgi baǵyttary saiasi dialog, óńirishilik yntymaqtastyqty damytý, biznesti kótermeleý, ziiatkerlik dialog, mádeni bailanystar men adami almasý bolyp tabylady. Dialog aiasynda Syrtqy ister ministrleriniń kezekti 8-shi keńesin Tokioda 2021 jyly ótkizý josparlanyp otyr.
