Ortalyq Aziia Memleket basshylary Konsýltativtik kezdesýiniń qorytyndysy boiynsha Birlesken málimdeme qabyldandy. Bul týraly QR Prezidentiniń baspasóz qyzmeti habarlady.
2021 jylǵy 6 tamyzda Túrikmenbashy qalasynda Qazaqstan Respýblikasynyń Prezidenti, Qyrǵyz Respýblikasynyń Prezidenti, Tájikstan Respýblikasynyń Prezidenti, Túrikmenstan Prezidenti jáne Ózbekstan Respýblikasynyń Prezidentiniń qatysýymen Ortalyq Aziia Memleketteri basshylarynyń Konsýltativtik kezdesýi ótti.
Memleketter basshylary dostyq, ózara qurmet pen senim, syndarlyq jáne ózara túsinistik jaǵdaiynda ótken kelissózderdiń qorytyndylary boiynsha,
tarihi qalyptasqan dostyq jáne tatý kórshilik qatynastar negizinde óńirlik yntymaqtastyqty damytýdyń údemeli protsesin atai otyryp,
Birikken Ulttar Uiymy Jarǵysynyń qaǵidattaryn negizge ala otyryp jáne halyqaralyq quqyqtyń jalpyǵa birdei tanylǵan normalaryn saqtaýǵa óziniń berik beiildiligin rastai otyryp,
ózara qurmet, teń quqylyq, bir-biriniń múddelerin eskerý negizinde kelissózder men konsýltatsiialar arqyly Ortalyq Aziia óńirin damytýdyń ózekti máselelerin qaraý jáne sheshý qajettigin atap kórsete otyryp,
óz memleketteriniń óńirdegi beibitshilikti, turaqtylyq pen qaýipsizdikti qamtamasyz etý múddesinde ashyq jáne keń aýqymdy ózara is-qimylǵa ázirligin atai otyryp,
saiasat, ornyqty jáne turaqty damý, saýda-ekonomikalyq jáne investitsiialyq-qarjylyq, kólik-kommýnikatsiialyq, sý-energetikalyq, aqparattyq-tehnologiialyq, ekologiialyq jáne mádeni-gýmanitarlyq yntymaqtastyqty qosa alǵanda, ózara múddelilik bildirilgen barlyq salalardaǵy qatynastardy odan ári keńeitýge jáne nyǵaitýǵa degen jalpy umtylysty negizge ala otyryp,
Ortalyq Aziia memleketteriniń mańyzdy jahandyq jáne óńirlik problemalardy sheshýdegi birlesken bastamalarynyń álemdik arenada eleýli nátijeleri bar ekenin atap óte otyryp,
jahandyq syn-tegeýrinder men qaýipterge, onyń ishinde koronavirýstyq infektsiia pandemiiasyna qarsy is-qimylda, sondai-aq onyń teris saldaryn birlesip eńserýde óńir memleketteriniń tyǵyz áriptestiginiń mańyzdylyǵyn atap kórsete otyryp,
Ortalyq Aziia Memleketteri basshylarynyń júieli túrdegi Konsýltativtik kezdesýleri óńirdegi kópjaqty memleketaralyq yntymaqtastyqty odan ári nyǵaitýǵa yqpal etetin ózekti máseleler boiynsha usynystardy talqylaýǵa jáne engizýge múmkindik beretinin taǵy da rastai otyryp,
tómendegini málimdeidi:
1. Memleketer basshylary biylǵy Konsýltativtik kezdesý Ortalyq Aziia memleketteri táýelsizdiginiń 30 jyldyǵy qarsańynda ótip jatqanyn atap ótedi.
Osy oraida Taraptar atalǵan forýmnyń Ortalyq Aziia elderi arasyndaǵy qatynastardy odan ári nyǵaitý jáne damytý isindegi tarihi mańyzdylyǵyn airyqsha atap kórsetedi.
2. Taraptar ekijaqty jáne kópjaqty is-sharalar ótkizý, Ortalyq Aziia óńiriniń barlyq memleketteriniń beibit damýyna, órkendeýi men turaqtylyǵyna járdemdesý maqsatynda ózara saparlardy júzege asyrý jolymen kópjaqty ózara is-qimyldy keshendi damytýdyń ózektiligi men qajettiligin rastaidy.
3. Taraptar Túrikmenbashy qalasyndaǵy Konsýltativtik kezdesý qaýipsizdik pen turaqtylyqty qamtamasyz etý, saýda, ekonomika jáne investitsiialar, kólik jáne tranzit, aýyl sharýashylyǵy jáne azyq-túlik qaýipsizdigi salalarynda ónerkásiptik kooperatsiia, sý-energetikalyq resýrstar, qorshaǵan ortany qorǵaý, týrizm, ǵylym, bilim, mádeniet jáne genderlik teńdik máselelerinde óńirlik ózara tiimdi yntymaqtastyqty odan ári damytýdyń perspektivalyq baǵyttaryn, nysandary men tetikterin jan-jaqty qaraýǵa múmkindik bergenin atap ótedi.
4. Memleket basshylary óz elderiniń áleýetin óńirde qaýipsiz, turaqty, keń jáne ashyq áriptestikke arnalǵan keńistik qalyptastyrý múddesine paidalanýdyń mańyzdylyǵyn atap ótedi.
Osyǵan orai Taraptar syrtqy ister ministrlikteri, diplomatiialyq ókildikter, konsýldyq mekemeler, sondai-aq Ortalyq Aziia memleketteriniń BUU janyndaǵy turaqty ókildikteri men basqa da halyqaralyq uiymdar jelisi boiynsha konsýltatsiialar ótkizýdiń, bailanystar men olardy nyǵaitýdyń mańyzdylyǵyn atap kórsetedi.
5. Taraptar BUU Bas Assambleiasy Halyqaralyq beibitshilik jáne senim jyly dep jariialaǵan biylǵy 2021 jyly halyqaralyq qoǵamdastyqtyń Birikken Ulttar Uiymy tulǵasynda qabyldaǵan keń aýqymdy jáne uzaq merzimdi strategiialardy, tujyrymdamalar men baǵdarlamalardy iske asyrý isinde naqty nátijelerge qol jetkizý maqsatynda Ortalyq Aziia memleketteriniń halyqaralyq arenadaǵy shoǵyrlanǵan qyzmetin jandandyrý qajet dep esepteidi.
6. Memleketter basshylary 2021 jyly Ortalyq Aziiada, Iadrolyq qarýdan azat aimaq týraly shartqa qol qoiylýynyń 15 jyldyǵy, sondai-aq Semei iadrolyq synaq poligony jabylýynyń 30 jyldyǵy atalyp ótetinine erekshe toqtaldy.
Osyǵan bailanysty Prezidentter Ortalyq Aziiadaǵy, Iadrolyq qarýdan azat aimaq týraly shartty iske asyrý boiynsha óńir memleketteriniń belsendi yntymaqtastyǵyn jalǵastyrýǵa daiyn ekendikterin bildirdi jáne iadrolyq qarýsyzdaný men taratpaý isinde kúsh-jigerdi shoǵyrlandyrý maqsatynda basqa da iadrolyq qarýsyz aimaqtarmen ózara is-qimyldy jandandyrý qajettigin atap ótti.
7. Taraptar kórshi Aýǵanstandaǵy jaǵdaidyń jýyq aradaǵy rettelýi Ortalyq Aziiadaǵy qaýipsizdik pen turaqtylyqty saqtaý men nyǵaitýdyń mańyzdy faktorlarynyń biri bolyp tabylatynyn rastaidy. Osyǵan orai, Taraptar Aýǵan qoǵamyndaǵy azamattyq beibitshilik pen kelisimge jedel qol jetkizýge jan-jaqty kómek kórsetýge daiyn ekendikterin bildirdi.
Osy oraida Taraptar barlyq múddeli memleketter men halyqaralyq uiymdardyń Aýǵanstandaǵy qaýipsizdik pen turaqtylyqty qamtamasyz etýge, eldiń áleýmettik-ekonomikalyq infraqurylymyn qalpyna keltirýge jáne ony álemdik sharýashylyq bailanystarǵa tartýǵa baǵyttalǵan kúsh-áreketterin qoldaidy.
8. Taraptar óńirdi damytýdyń ózekti máselelerin júieli túrde qaraý úshin turaqty jumys isteitin konsýltativtik platforma retinde Ortalyq Aziiadaǵy qaýipsizdik pen yntymaqtastyq jónindegi dialog qurý máselesin pysyqtaýdy qoldady.
9. Taraptar Ortalyq Aziia óńiriniń turaqty damýyn saýda-ekonomikalyq, investitsiialyq, ónerkásiptik, qarjylyq, energetikalyq, aýyl sharýashylyǵy, kommýnikatsiialyq, áleýmettik, ekologiialyq jáne ózara múddeli basqa da salalardaǵy bailanystardy odan ári nyǵaitý arqyly qamtamasyz etý birinshi kezektegi mindet dep sanaidy.
Qarjy júiesin birlesip damytý jáne óńirge investitsiialar tartý maqsatynda Taraptar «Astana» halyqaralyq qarjy ortalyǵy alańyn Ortalyq Aziia óńiri elderin, sondai-aq sheteldik investorlarmen bailanystyratyn ekonomikalyq platforma retinde paidalanýǵa kelisti.
10. Taraptar Ortalyq Aziia memleketteri arasyndaǵy kóshi-qon protsesterin retteý salasyndaǵy quzyretti organdardyń ózara is-qimylyn kúsheitýdiń mańyzdylyǵyn, sondai-aq eńbekshi kóship-qonýshylardyń quqyqtary men múddelerin qorǵaýdy qamtamasyz etý, olarǵa quqyqtyq, áleýmettik, aqparattyq-konsýltatsiialyq kómek kórsetý qajettigin moiyndaidy.
11. Taraptar ózara taýar ainalymyn arttyrýdyń mańyzdylyǵyn jáne óńirdegi saýda rásimderin jeńildetý jónindegi mindetterdi tiimdi sheshýge ózara tiimdi ortaq tásilderdi odan ári ázirleý qajettigin atap ótedi.
Taraptar ózara saýdany ulǵaitý, shekara mańyndaǵy aýmaqtarda saýda-óndiristik alańdardy, sondai-aq kóterme-taratý ortalyqtary jelisin damytýdy qosa alǵandaǵy birlesken ekonomikalyq jobalardy iske asyrý maqsatynda Ortalyq Aziia memleketteriniń isker toptary men óńirleri arasyndaǵy yntymaqtastyqty keńeitý jónindegi jumysty jandandyrý qajettigin atap ótedi.
12. Taraptar aviatsiialyq, avtokólik, temirjol, ózen jáne teńiz kóligine arnalǵan jańa halyqaralyq baǵyttar qurý men jumys istep turǵandaryn jańǵyrta otyryp, mýltimodaldyq kólik dálizderin, logistikanyń, saýda men týrizmniń halyqaralyq kópfýnktsionaldy ortalyqtaryn, taýarlar men júkterdiń erkin jáne kedergisiz tranzitin qamtamasyz etý, úzdik halyqaralyq tájiribelerge sáikes transshekaralyq rásimderdi jeńildetý jáne óńirdiń tranzittik áleýetin tiimdi paidalanýdy qamtamasyz etetin basqa da birlesken infraqurylymdyq jobalardy iske asyrý maqsatynda kólik-tranzit salasyndaǵy kópjaqty yntymaqtastyqty odan ári tereńdetýdiń mańyzdylyǵyn airyqsha atap kórsetedi.
Taraptar «Soltústik – Ońtústik» jáne «Shyǵys – Batys» halyqaralyq dálizderin birlesip damytýǵa barynsha kúsh salady.
Taraptar Kólik kommýnikatsiialary jónindegi óńirlik keńes qurýdy jedeldetý, óńir memleketteri qatysatyn tiimdi halyqaralyq kólik dálizderin qalyptastyrý boiynsha iske asyrylyp jatqan jáne perspektivaly jobalardy eskere otyryp, Ortalyq Aziiada kólik júiesin birlesip damytý jónindegi baǵdarlama men kelisimdi kelisý qajettigin atap ótti.
Taraptar ózbek tarapynyń Birikken Ulttar Uiymy aiasyndaǵy Kóliktik-kommýnikatsiialyq ózara bailanysty damytýdyń óńirlik ortalyǵyn qurý týraly bastamasyn qoldady.
Taraptar óńirlik qosylǵan qun tizbekterin jáne birlesken ónerkásiptik klasterlerdi qurý, tsifrlyq ekonomikany ilgeriletýdegi yntymaqtastyqty arttyrý arqyly ózara saýda kólemin ulǵaitýǵa niettenip otyr.
13. Taraptar saýda-ekonomikalyq, energetikalyq, kóliktik-logistikalyq jáne innovatsiialyq baǵyttarda ózara yntymaqtastyqqa maqsatty jáne júieli sipat berý maqsatynda Ortalyq Aziia elderiniń ónerkásipshileri men kásipkerleriniń besjaqty keńesin qurý qajettigi týraly málimdedi.
14. Taraptar áleýmettik jáne ekonomikalyq ósýdiń jańa kózderin izdeý maqsatynda innovatsiialyq baǵdarlamalar men jobalardy birlesip iske asyrý úshin kúsh-áreketterdi biriktirýge, sondai-aq ǵylym, tehnologiialar men innovatsiialar salasyndaǵy tiimdi yntymaqtastyqqa qoldaý kórsetýge, ǵylymi zertteýlerdi birlesip júrgizýge, ǵylymi-zertteý ortalyqtary arasynda tájiribe almasýǵa niet bildiredi.
15. Taraptar Joǵary oqý oryndary arasyndaǵy jáne ǵylymi almasýlardyń óńirlik baǵdarlamasyn ázirleý arqyly rektorlar forýmdary, ǵylymi konferentsiialar men ǵylymi-pedagogikalyq jáne stýdenttik jurtshylyq pen jastar simpoziýmdary sheńberinde bilim berý, «ǵylymi diplomatiia» salasyndaǵy yntymaqtastyqty tereńdetýdi qoldaidy.
Taraptar aqparattyq-kommýnikatsiialyq tehnologiialardyń damýy men paidalanýdaǵy progresti, sondai-aq kúndelikti ómirge degen údemeli áserin atap kórsetedi. Memleketter halyqaralyq quqyq qaǵidattary men normalaryn saqtai otyryp, aqparattyq qaýipsizdiktiń jańa qaterlerin eńserý maqsatynda kúsh-jiger biriktirýge nietti.
16. Ortalyq Aziia memleketteriniń barlyǵy klimattyń ózgerý saldaryn jumsartý jáne oǵan beiimdelý, shóleittenýge qarsy kúres, sý-energetikalyq resýrstardy utymdy paidalaný, qorshaǵan orta men ekologiiany qorǵaý, muzdyqtardy saqtaý jáne ýran qaldyqtary qoimalaryn rekýltivatsiialaý, jańartylatyn energiia kózderin damytýdy qosa alǵanda, qorlardy únemdeitin jáne jasyl tehnologiialardy engizýge baǵyttalǵan jobalar men baǵdarlamalardy ilgeriletý salasyndaǵy óńirlik yntymaqtastyqty nyǵaitý qajettigin atap ótti.
Taraptar osy salalarda óńirdegi ornyqty damý maqsattaryna qol jetkizý úshin uzaq merzimdi jáne ózara tiimdi yntymaqtastyq tetikterin jetildirý úshin birlesken kúsh-jiger jumsaýǵa daiyn.
Taraptar óńirdiń barlyq elderiniń múddelerin eskeretin Ortalyq Aziiadaǵy sý-energetikalyq máselelerdi sheshýge qolǵabys etý úshin qoldanystaǵy jáne salynyp jatqan gidroenergetikalyq obektilerdiń mańyzdylyǵyn atap ótti.
Taraptar BUU Bas Assambleiasynyń 75-shi sessiiasynyń «Tabiǵat shekara tanymaidy: transshekaralyq yntymaqtastyq – bioártúrlilikti saqtaýdyń, qalpyna keltirýdiń jáne turaqty paidalanýdyń negizgi faktory», «Turaqty damýǵa arnalǵan sý» 2018-2028 jyldardaǵy is-qimyldardyń halyqaralyq onjyldyǵynyń maqsattaryna qol jetkizý barysyna ortamerzimdi jan-jaqty sholý boiynsha Birikken Ulttar Uiymynyń konferentsiiasy», «Aral óńirin ekologiialyq innovatsiialar men tehnologiialar aimaǵy dep jariialaý», «Birikken Ulttar Uiymy men Araldy qutqarý jónindegi halyqaralyq qor arasyndaǵy yntymaqtastyq», «Qazaqstandaǵy Semei óńiri halqyn ońaltý, qorshaǵan ortasyn qalpyna keltirý jáne ekonomikalyq damý maqsatyndaǵy halyqaralyq yntymaqtastyq jáne is-sharalardy úilestirý» qararlaryn qabyldaý siiaqty halyqaralyq jáne óńirlik bastamalardy tutas túsinýge qol jetkizýdiń jáne BUU alańynda ilgeriletýdiń mańyzdylyǵyn atap kórsetedi.
Jahandyq klimattyń ózgerýiniń álemdegi, atap aitqanda Ortalyq Aziiadaǵy muzdyqtarǵa teris áserin eskere otyryp, Memleketter basshylary Tájikstan Respýblikasy Prezidentiniń 2025 jyldy Halyqaralyq muzdyqtardy saqtaý jyly dep jariialaý jáne Muzdyqtardy qorǵaý halyqaralyq qoryn qurý týraly usynysyn qoldady.
Memleketter basshylary Túrikmenstan Prezidentiniń Tómen kómirtekti energetikany damytý jónindegi sharalardy júzege asyrýǵa baǵyttalǵan BUU Strategiiasyn ázirleý týraly bastamasyna, sondai-aq BUU aiasynda energetikadaǵy basym baǵyttardyń biri retinde sýtegin damytý jónindegi halyqaralyq «Jol kartasyn» qurýǵa qoldaý bildirdi.
17. Memleketter basshylary óńirdegi, onyń ishinde Aral teńizi basseinindegi, ásirese ekologiialyq daǵdarys pen klimat ózgerýiniń teris áserine ushyraǵan aimaqtardaǵy áleýmettik-ekonomikalyq jáne ekologiialyq jaǵdaidy saýyqtyrýmen bailanysty problemalardy keshendi sheshý úshin kúsh-jigerdi shoǵyrlandyrýdyń mańyzdylyǵyn moiyndady.
18. Taraptar sýdyń, atmosferalyq aýanyń lastanýyn azaitýǵa, muzdyqtardy, jerdiń tozýyn saqtaýǵa, orman ekpeleri alańdaryn ulǵaitýǵa, tabiǵat apattarynyń, onyń ishinde sý tasqyny, sel tasqyny, qurǵaqshylyq táýekelderin azaitýǵa, sondai-aq taza aýyz sýmen qamtamasyz etýge baǵyttalǵan kelisilgen sharalar qabyldaý qajettigin atap ótti.
Memleketter basshylary Ortalyq Aziianyń barlyq memleketteriniń múddeleri men qatysýyn eskere otyryp, Araldy qutqarý jónindegi halyqaralyq qordyń uiymdyq qurylymy men sharttyq-quqyqtyq bazasyn jetildirý jóninde júrgizilip jatqan jumystardyń mańyzdylyǵyn atap ótti.
19. Búgin, adamzat jańa jahandyq qaýip-qaterge - koronavirýstyq infektsiianyń pandemiiasyna tap bolǵan kezde, Ortalyq Aziia memleketteri osy infektsiianyń taralýyna qarsy keshendi sharalar qabyldap jatyr.
Osy baǵyttaǵy qadamdaryn álemdik qoǵamdastyqtyń qyzmetimen tolyq úilestire otyryp, taraptar koronavirýspen kúreste mańyzdy halyqaralyq bastamalardy qoldaidy.
Memleketter basshylary Qazaqstan Respýblikasy Prezidentiniń BUU aiasynda Aýrýlar jáne bioqaýipsizdikti baqylaý jónindegi óńirlik ortalyqtar jelisin qurý, sondai-aq BUU aiasynda arnaiy kópjaqty organ - BUU Qaýipsizdik Keńesine esep beretin Biologiialyq qaýipsizdik jónindegi halyqaralyq agenttik qurý týraly bastamasyna qoldaý bildirdi.
Osyǵan orai, Taraptar ǵylymi diplomatiia jelisi boiynsha ózara is-qimyldy jandandyrýǵa, ǵalym-medikterdiń, sarapshylar men bilimniń ózge de aralas salalaryndaǵy mamandardyń júieli qarym-qatynasy úshin barlyq qajetti jaǵdailardy jasaýǵa kelisti.
Ortalyq Aziia memleketteriniń qaýipti infektsiialardyń taralýyna qarsy is-qimyl jasaý isindegi kúsh-jigerin shoǵyrlandyrý maqsatynda Taraptar virýstardyń jáne basqa da infektsiialardyń shyǵý tabiǵatyn, olar týdyratyn aýrýlardyń shyǵý nysandaryn, infektsiialyq aýrýlardy emdeý jáne aldyn alý ádisterin zerdeleý jónindegi óńirlik tetik qurý týraly máseleni qaraý qajet dep sanaidy.
20. Azyq-túlik júieleriniń turaqtylyǵyn arttyrý qajettiligi turǵysynan Taraptar jetkizý tizbegin qoldaýǵa jáne azyq-túlik pen kúndelikti qajet taýarlarǵa arnalǵan «jasyl dálizder» tetikterin keńinen engizýge kelisti.
21. Taraptar Ortalyq Aziiany mekendeitin halyqtardyń múddesi úshin jáne BUU jariialaǵan Mádenietterdi jaqyndastyrýdyń halyqaralyq onjyldyǵy rýhynda mádenietaralyq dialogty damytýǵa, alýan túrli mádenietter men ultaralyq toleranttylyqty saqtaýǵa jáne kótermeleýge, etnosaiasatty, óńirdiń materialdyq jáne materialdyq emes mádeni jáne tabiǵi murasyn zerdeleý men qorǵaý salasynda yntymaqtasýǵa jáne ózara qoldaý kórsetýge, ádebi bailanystardy jetildirýge, halyqaralyq festivaldar, forýmdar men konkýrstar ótkizýge, mýzyka, teatr, beineleý jáne qolóneri, kinematografiia, teleradio habarlaryn taratý, muraǵat, murajai men kitaphana isi salasyndaǵy ózara is-qimyldy tereńdetýge jáne azamattar, eń aldymen jastar arasyndaǵy tikelei bailanystar men týristik almasýlardy damytýǵa kelisti.
Osy baǵyttaǵy ózara is-qimylǵa júieli jáne turaqty sipat berý maqsatynda Taraptar «Ortalyq Aziia: ortaq tarih jáne ortaq bolashaq» atty mádeni-gýmanitarlyq almasýdyń biryńǵai platformasy retinde Ortalyq Aziia mádeni dialog forýmyn qurýǵa ýaǵdalasty.
22. Sporttyń halyqtar arasyndaǵy dostyqty nyǵaitýdaǵy mańyzdy rólin eskere otyryp, Memleketter basshylary dene shynyqtyrý men sportty damytýdy jalǵastyrýǵa, Taraptar aýmaqtarynda halyqaralyq sporttyq-buqaralyq is-sharalardy ótkizýge qoldaý kórsetýge, dene shynyqtyrý, sport uiymdary men mekemeleri arasyndaǵy yntymaqtastyqty kótermeleýge kelisti. Sondai-aq ulttyq sport túrlerin halyqaralyq sport arenasyna ilgeriletý boiynsha Taraptar kúsh-jigerdi shoǵyrlandyrýy qajet ekeni atalyp ótti.
23. Memleketter basshylary týrizm salasynda, onyń ishinde pandemiiadan keiin osy sektordy jedel qalpyna keltirý jáne óńir elderi arasyndaǵy týristik almasýdy jandandyrý maqsatyndaǵy tyǵyz ózara is-qimyldyń qajettigin atap ótti.
Sondai-aq Taraptar transshekaralyq aýmaqtarda týristik aimaqtar men klasterler qurý, Ortalyq Aziiada biryńǵai keńistik qurý maqsatynda týristik ónimder men baǵyttardy birlesip ilgeriletý jumystaryn jandandyrýǵa kelisti.
Taraptar halyqaralyq jáne ishki týrizmdi damytýǵa qatysatyn uiymdar jáne týrizm salasyndaǵy memlekettik basqarý organdary men týristik kompaniialar arasyndaǵy tyǵyz yntymaqtastyqty qoldaidy.
Taraptar týristik qyzmetti damytý týraly aqparatpen, baspa materialdarymen, filmdermen almasýda, jarnamalyq kampaniialar, konferentsiialar men seminarlar ótkizýde, kórmeler men jármeńkeler uiymdastyrýda odan ári yntymaqtastyq jasaityn bolady.
24. Memleketter basshylary syrtqy saiasi vedomstvolarǵa 2022-2024 jyldarǵa arnalǵan óńirlik yntymaqtastyqty damytý jónindegi jol kartasy jobasyn (Ortalyq Aziia Memleketteri basshylarynyń konsýltativtik kezdesýleriniń qorytyndylary boiynsha) bekitý jumystaryn jýyq arada aiaqtaýdy tapsyrdy.
25. Memleketter basshylary syrtqy saiasi vedomstvolarǵa Ortalyq Aziia Memleketteri basshylarynyń kelesi Konsýltativtik kezdesýinde XXI ǵasyrda Ortalyq Aziiany damytý maqsatynda dostyq, tatý kórshilik jáne yntymaqtastyq týraly shartqa qol qoiýdy daiyndaýdy tapsyrdy.
26. Prezidentter Ortalyq Aziia Memleketteri basshylarynyń Konsýltativtik kezdesýleriniń Biryńǵai rámizin paidalaný týraly sheshim qabyldady jáne ol týraly Erejeni maquldady.
27. Prezidentter Ortalyq Aziia Memleketteri basshylarynyń Qurmet belgisin bekitý týraly sheshim qabyldap, Qurmet belgisi týraly Ereje men onyń Sipattamasyn maquldady.
28. Memleketter basshylary Túrikmenbashy qalasynda ótip jatqan Ortalyq Aziia elderi áielder dialogynyń forýmyna, Ortalyq Aziia elderiniń Ekonomikalyq forýmyna, Ortalyq Aziia elderiniń Ulttyq ónimder halyqaralyq kórmesine, Ortalyq Aziia elderiniń Ulttyq taǵamdar halyqaralyq festivaline jáne Ortalyq Aziia elderiniń Mádeniet jáne óner sheberleriniń saltanatty kontsertine joǵary baǵa berdi.
Memleketter basshylary Syrtqy ister ministrlerine Ortalyq Aziia Memleketteri basshylarynyń tórtinshi Konsýltativtik kezdesýin ótkizý merzimi men orny boiynsha usynystar daiyndaýdy jáne Konsýltativtik kezdesýdiń kún tártibin ázirleýdi tapsyrdy.
Konsýltativtik kezdesý dástúrli dostyq, shyraily jáne senimdi atmosferada ótti.
Memleketter basshylary Túrikmenstan Prezidenti Gýrbangýly Mialikgýlyevich Berdimuhamedovke qonaqjailylyǵy jáne Konsýltativtik kezdesýdi joǵary deńgeide uiymdastyrǵany úshin rizashylyq bildirdi.
Túrikmenbashy q., 2021 jylǵy 6 tamyz
