Foto: Sputnik / Vladislav Vodnev
Jańa Salyq kodeksiniń arqasynda kelesi jyldan bastap respýblikalyq biýdjetke qosymsha shamamen 3 trillionnan astam túsimder túsedi. Bul týraly QR Premer-ministri Oljas Bektenov málimdedi, dep habarlaidy Ult.kz.
"Memleket óz mindettemelerin tolyq kólemde oryndap jatyr. Oryndaidy da. Buǵan eshqandai kúmán joq. Jalpy ekonomikalyq ahýal turaqty. Biraq siz aityp ótken máseleler joq emes. Ol ózderińiz biletindei, bir kúnde paida bolǵan problemalar emes. Birneshe jyldar boiy qalyptasyp jatqan máseleler. Úkimet qazirgi tańda onyń bárin sheshý úshin belsendi jumys atqaryp jatyr. Úkimettiń bastamasymen elimizde salyq reformasy júrip jatyr. Osy jýyrda ǵana jańa Salyq kodeksi qabyldandy. Búgingi múmkindikti paidalana otyryp, konstrýktivti ortaq jumys úshin depýtattyq korpýsqa alǵysymdy bildiremin", - degen Úkimet basshysy jańa Salyq kodeksiniń arqasynda kelesi jyldan bastap respýblikalyq biýdjetke qosymsha shamamen 3 trillionnan astam túsimder túsedi dep esepteitinin aitty.
Oljas Bektenov bul qarjynyń barlyǵy tek damý maqsattaryna baǵyttalatynyn jetkizdi.
"Damý maqsattary degenimiz ol birinshi kezekte iri infraqurylymdyq nysandardy iske qosý, elektr qýat kózderin, avtomobil jáne temirjol joldarynyń jelisin damytý, injenerlik jelilerdi jańǵyrtý siiaqty mańyzdy mindetterge joldanatyn bolady. Al bul salalar uzaqmerzimdi turaqty ekonomikalyq ósimdi qamtamasyz etedi. Sondyqtan biz osy baǵyttarda belsendi ári tiimdi jumys jasaityn bolsaq, elimizde turaqty ekonomikalyq ósim bolady. Onyń nátijesinde salyqtyq baza keńeiedi. Jáne respýblikalyq biýdjetke túsimder túsedi. Sonyń arqasynda memleket ári qarai da óz mindetterin oryndaidy", - dedi ol.
Sondai-aq ol kelesi úsh jylǵa arnalǵan respýblikalyq biýdjettiń jobasyn Úkimette daiyndap jatqandaryn jetkizdi.
Úkimet basshysynyń sózinshe 2026 jyly biýdjet tapshylyǵyn qazirgi 2,7%-dan 2,5%-ǵa deiin tómendetip, 2027 jyly 1,8%-ǵa deiin, 2028 jyly 1,4 %-ǵa deiin biýdjet tapshylyǵyn tómendetý josparlanǵan.
"Memleket basshysy Ulttyq qordyń qarjysyn biýdjet tapshylyǵyn jabý úshin emes, tek qana respýblikalyq mańyzy bar iri infraqurylymdyq jobalardy salý kerek dep bizge naqty tapsyrma qoidy. Biz osy tapsyrmalardy múltiksiz oryndaimyz", - dedi Oljas Bektenov.
