Niý-Iork qalasynyń basshylyǵy koronavirýstyń taralýyna jol bermeýge barlyq kúshin jumyldyrýda, dep habarlaidy CNN.
Niý-Iork qalasynyń 11 turǵynynan koronavirýstyń jańa túri anyqtalǵan. Shtat úkimeti indetke shaldyqqandarmen bailanysta bolǵan 1000-ǵa jýyq adamǵa úidegi karantinde otyrýǵa keńes berdi.
Sondai-aq, Niý-Iork mańynda ornalasqan Maýnt-Vernondaǵy barlyq mektepter 9 naýryzǵa deiin jabylatyny týraly habarlandy. Qyzmetkerleriniń birinen jańa koronavirýs anyqtalǵan Facebook kompaniiasy Sietldegi keńsesin japty.
Budan basqa, búgin Tehas jáne Niý-Djersi shtattarynyń biligi koronavirýsqa shaldyǵýdyń birinshi oqiǵalarynyń tirkelgenin rastady. Tehasta indetke shaldyqqan adam Hiýston mańyndaǵy Fort okrýginde anyqtaldy. 70 jastaǵy er adam buǵan deiin shetelge baryp kelgen. Qazirgi kezde ol aýrýhanada jatyr.
Niý-Djerside koronavirýs 30 jastaǵy er adamnan anyqtalǵan. 3 naýryz kúni ol Bergen okrýginde aýrýhanaǵa jatqyzyldy.
Qurama Shtattar jańa koronavirýsty juqtyrýdyń 158 oqiǵasy týraly habarlady. Sonyń ishinde 48 adam shetelge baryp kelgen soń aýyrdy: úsh adam qytailyq Ýhanǵa barsa, 45 adam Japoniianyń Diamond Princess krýizdik lainerinen túsken. Aýrýǵa shaldyǵýdyń taǵy 110 oqiǵasy el aspaǵan azamattardan anyqtaldy.
