2021 jylǵy 18 qazanda Niý-Iorktiń Ońtústik okrýgi boiynsha AQSh Okrýgtik sotynyń sýdiasy Elison Dj. Natan M.Abliazov pen I.Hrapýnov bergen túrli qarsylyqtardy qabyldamai, «BTA Banki» AQ men Almaty qalasy ákimdiginiń (budan ári – Birlesken talapkerler) birlesken talap-aryzy boiynsha bastalǵan sot qaraýy kezinde zańsyz áreketteri úshin olarǵa sanktsiialar saldy, dep habarlaidy "Ult aqparat" Qazaqstan Ádilet ministrliginiń baspasóz qyzmetine silteme jasap.
Sýdia Natannyń sheshiminde sonymen qatar Abliazov pen Hrapýnovqa sanktsiialar salǵan AQSh bitistirýshi sotynyń burynǵy birneshe qaýlylary (2019 jylǵy 3 shilde, 2019 jylǵy 15 shilde, 2020 jylǵy 7 aqpan, 2020 jylǵy 19 mamyr jáne 2020 jylǵy 3 qyrkúiek) rastaldy.
Bul sheshim Sottyń aldyńǵy sheshimderimen qatar, Abliazov, Viktor Hrapýnov jáne Iliias Hrapýnovtyń Birlesken talapkerlerdiń AQSh-ta ondaǵan million dollardy jylystatqany úshin Abliazovqa, Hrapýnovqa jáne Triadou SPV SA jasandy kompaniiasyna qoiylatyn talaptary úshin «úlken mańyzy bar» dáleldemelerdi tabýyna kedergi keltirgenin anyqtady.
Sot jaýapkerlerdiń jasyrǵan jáne qasaqana joiǵan dálelderi bolǵandyǵyn, jalǵan aiǵaqtar bergendigin, sot buiryqtaryn buzǵandyǵyn jáne sot protsesin «mysyq-tyshqan oiyny» retinde qabyldaǵandyqtaryn anyqtady.
Atalǵan sheshimde aitylǵan naqty zańsyzdyqtardyń ishinde sot mynalardy atap ótti:
- Abliazov «sottyń odan dáleldemeler usynýdy talap etken qaýlysyn oryndamady»;
- «Abliazov ózinde joǵaryda atalǵan dálelderdiń joq ekendigin málimdedi, biraq bul málimdeme onyń óziniń ant berý arqyly bergen aiǵaqtaryna qaishy keldi»;
- Hrapýnovtar «eshqandai sebepsiz bir de bir qarjylyq esep bergen joq»;
- Sot «aqparatty ashý tártibiniń negizgi buzýshysy» dep ataǵan Iliias Hrapýnov Birlesken talapkerler ózderiniń birlesken talap-aryzyn berýden azǵana buryn óziniń barlyq hattaryn óshirip tastap, onyń ornyna «júzdegen» shifrlanǵan elektrondyq poshta adresterin qoldana bastady, sodan keiin olardyń eshqaisysyna qol jetkize almaityndyǵy týraly «oiǵa qonbaityn» málimdemeler jasady;
- Ilias Hrapýnov sonymen birge ózi úshinshi tulǵalarǵa jibergen elektrondyq hattaryn moiyndaýdan bas tartty jáne «ondaǵan nemese júzdegen million dollarlarǵa qatysty qarjylyq operatsiialar týraly eshteńe bilmeimin», dep málimdedi;
- Abliazov óziniń menshikti kapitaly 20 milliard AQSh dollarynan asatynyn aityp, biraq oǵan osy aqshany tabýǵa jáne basqarýǵa járdemdesken adamdardy atai almaitynyn málimdedi;
Zańsyz áreket týraly osy jáne osyǵan uqsas tujyrymdardyń negizinde sot Birlesken talapkerlerdiń paidasyna Abliazovtyń 140 115,16 AQSh dollary mólsherinde aiyppul tóleý qajettigi týraly sheshim shyǵardy.
Sot I.Hrapýnovqa qatysty sanktsiianyń mólsherin onyń minez-qulqynyń saldarynan bolǵan shyǵyndar týraly Birlesken talapkerlerden qosymsha dálelder alǵannan keiin anyqtaidy.
Sot sonymen birge «onyń sheshimine kez-kelgen apelliatsiia berilgen jaǵdaida, bul áreket «sheshimdi óz erkimen oryndaýdan bas tartý» retinde qabyldanady» dep qaýly etti.
Niý-Iork isi Birlesken talapkerler atynan bes jyl buryn M.Abliazovtyń jáne onyń sybailastarynyń urlanǵan aqshany AQSh-ta jylystatqany úshin aiyptaýy boiynsha bastalǵan.
Búkil álem boiynsha Sottar anyqtaǵandai, Abliazov jalǵan nesieler berý arqyly BTA bankinen milliardtaǵan dollar urlady – bul úshin ol Qazaqstanda sottalyp, Ulybritaniianyń sottarynda azamattyq jaýapkershilikke tartyldy.
AQSh-taǵy sot talqylaýy barysynda talapkerler Abliazov qylmystarynyń qosymsha eleýli dálelderin jinady, sondai-aq osy qylmystardyń kóptegen kýáleriniń aiǵaqtaryn qamtamasyz etti. Qazirgi ýaqytta AQSh-tyń Niý-Iorktegi alqabilerine qatysty sot isin 2022 jyldyń aqpan aiynda bastaý josparlanýda.
