Reseilik joiǵysh ushaqpen soqtyǵysqannan keiin Qara teńizge qulaǵan amerikalyq MQ-9 Reaper drony Rýmyniiadaǵy bazadan ushyp shyqqan. Ol josparly barlaý jumystaryn júrgizgen. Bul jóninde AQSh áskeri salasynyń sheneýnigine súiengen amerikalyq New York Times basylymy jazdy, dep habarlaidy Azattyq.
Derekkózdiń aitýynsha, dron Hellfire raketalaryn da alyp júre alady, biraq oqiǵa kezinde onda raketa bolmaǵan. Apparat óz missiiasyn 14 naýryzda Ýkrainanyń Resei anneksiialap alǵan Qyrym túbeginiń ońtústik-batysynan shamamen 120 shaqyrym jerde atqarǵan. Sol jerde ony reseilik eki áskeri ushaq ustaǵan.
CBS telearnasy dronnyń qulaý sátin modeldep, efir kezinde kórsetken. Kadrdan istrebitel apparatqa tómengi jaǵynan jaqyndap, oǵan otyn shashqany kórinedi. Budan soń buramasyn túrtip ketken. Osydan keiin MQ-9 Reaper drony áýede birneshe ret aýdarylyp, qulai bastaǵan.
AQSh ulttyq qaýipsizdik jónindegi keńesiniń ókili Djon Kirbi CNN arnasyna bergen suhbatynda Vashington apparattyń qaldyqtary Amerikaǵa ǵana berilýge tiis dep málimdedi. "AQSh óz qaýipsizdigin qorǵaý sharalaryn qolǵa aldy" degen Kirbi mán-jaidy naqtylamady.
Resei qorǵanys ministrligi reseilik istrebitelder amerikalyq dronǵa tigen joq, dronnyń ózi transponderi óshirilgen kúii ushty dep málimdedi. Vedomstvo sonymen birge dron "áskeri operatsiia" (Resei biligi Ýkrainaǵa basqynshylyǵyn osylai dep ataidy) júrgizý maqsatynda belgilengen áýe keńistiginiń shekaralaryn buzǵan" dedi. Resei jaǵy dronnyń qulaýyna onyń jyldam manevr jasaýy sebep bolǵan deidi.
Oqiǵa AQSh prezidenti Djo Baidenge habarlanǵan. Reseidiń Vashingtondaǵy elshisi Anatolii Antonov AQSh memlekettik departamentine shaqyryldy. Ol oqiǵany arandatý dep atady. Degenmen diplomat "Máskeý Vashingtonmen teketireske barǵysy kelmeidi jáne pragmatikalyq qatynas ornatýǵa múddeli" dedi.
AQSh memlekettik departamenti de Reseidiń áreketin arandatý dep atap, bul "quzyret pen kásibiliktiń joqtyǵyn kórsetedi" dedi.
MQ-9 Reaper – AQSh qarýly kúshterindegi soqqy jasaityn negizgi drondardyń biri. Dron áýede 24 saǵat jáne saǵatyna 400 shaqyrymǵa deiin usha alady.
