Buǵan deiin Resei Qorǵanys ministrligi "Býchanyń beibit turǵyndary Resei áskeri 30 naýryzda shyǵyp ketkennen keiin ólgen" degen edi. Al spýtnikten túsirilgen sýretter bul vedomstvonyń ýájin joqqa shyǵardy. Muny The New York Times basylymy jazdy, dep habarlaidy Azattyq.
Gazet málimetine qaraǵanda, video men spýtnik sýretteri kóshedegi máiitter úsh apta buryn paida bolǵanyn kórsetedi. Bul kezde Býcha qalasyn Resei áskeri baqylap turǵan.
2 sáýirde jergilikti ákimshilik qyzmetkeri túsirgen videonyń birinde Iablýnskii kóshesinde adam máiitteri shashylyp jatqany kórinedi. The New York usynǵan Maxar Technologies kompaniiasynyń spýtnikten túsirilgen sýretteri kemi 11 máiit kóshede 11 naýryzdan beri jatqanyn kórsetken.
"Kei máiitter jarylys shuqyrynyń, ózgeleri máshinelerdiń janynda jatyr. Keibiriniń qoly artyna qaiyrylyp, aq matamen bailanǵan" dep jazady The New York Times.
Iablýnskii kóshesinde túsirilgen ekinshi videodan úsh máiit baiqalady. Biri velosipedtiń, ekinshisi máshineniń janynda jatyr. Spýtnik sýretteri bulardyń 20-21 naýryz aralyǵynda paida bolǵanyn kórsetken.
Resei Býchanyń beibit adamdarynyń ólimi jaily ózine qarata aitylǵan aiyptardy teriske shyǵaryp otyr. Reseidiń Birikken ulttar uiymyndaǵy turaqty ókili Vasilii Nebenzia Niý-Iorkte ótken baspasóz konferentsiiasynda "Býcha qalasyndaǵy jaǵdai – Resei áskerin diskreditatsiialaý úshin ádeii jasalǵan arandatý" dep atady. Nebenzianyń sózinshe, "Máskeý qolynda Resei áskeriniń buǵan esh qatysy joǵyn bildiretin dálel bar".
Resei 4 sáýirde Býchadaǵy jaǵdaiǵa bailanysty BUU Qaýipsizdik keńesin shaqyrýdy talap etti, alaida keńeske tóraǵalyq etip otyrǵan Ulybritaniia veto qoidy. Nebenzia muny "qaýipsizdik keńesiniń praktikasynda bolmaǵan óreskel qadam" dep atady.
Britaniia qaýipsizdik keńesiniń tóraǵasy retinde Reseidiń Býchaǵa bailanysty suranysyn Qaýipsizdik keńesiniń seisenbi, 5 sáýirde ótetin Ýkrainaǵa bailanysty kezdesýimen ushtastyrýdy uiǵarǵan.
