- 2010-2016 jyldary kiik atýdyń jáne olardyń múiizderin satýdyń 318 faktisi tirkeldi.
Bul týraly búgin QR Parlamenti Májilisinde ótip jatqan «Ósimdikter men janýarlar dúniesin qorǵaýdyń, ósimin molaitýdyń jáne olardyń obektilerin ornyqty paidalanýdyń ózekti máseleleri» taqyrybynda ótip jatqan «dóńgelek ústel» barysynda QR Aýyl sharýashylyǵy vitse-ministri Erlan Nysanbaev málim etti, dep habarlaidy Ult.kz tilshisi QazAqparat agenttigine silteme jasap.
«Jabaiy tuiaqty janýarlardyń sirek kezdesetin jáne joiylyp bara jatqan túrleri men kiikterdi saqtaý, olardyń sanyn qalpyna keltirý boiynsha jumystar júrgizilip jatyr. Alańdatýshylyq týdyratyn basty nysandardyń biri jabaiy dala antilopasynyń biregei túri kiikter bolyp otyr. Bul janýarlardyń dúniejúzilik taralymynyń 95 paiyzy Qazaqstan aýmaǵynda mekendeidi. Kiikterdi qorǵaýdyń nátijesinde olardyń sany 21 myń bastan 295 myń basqa deiin kóbeigen bolatyn. Biraq, ókinishke orai, 2015 jyly kiikterdiń qyrylyp qalýy oryn alyp, ústimizdegi jyly esepke alý qorytyndylary boiynsha, olardyń sany shamamen 108 myń basty quraidy. Qyrylý sebebi juqpaly aýrý - pasterellez. Jappai ólim-jitimge ushyraýdyń mundai faktisi buryn da oryn alǵan», - dedi vitse-ministr.
Onyń atap ótýinshe, kiikter sanynyń azaiýyna brokenerlik te áser etip otyr.
«2010-2016 jyldary kiik atýdyń jáne olardyń múiizderin satýdyń 318 faktisi tirkeldi. Jabaiy janýarlardyń sirek kezdesetin jáne joiylyp bara jatqan túrleri men kiikterdi qorǵaýmen «Ańshylyqzooónerkásip» uiymy ainalysady. Monitoring uiymdastyrý jáne kiikterdi spýtniktik radiomaiaktarmen tańbalaý paidalanylady. Qorǵaý sharalaryn uiymdastyrý inspektorlardyń kólikterinde ornatylǵan spýtniktermen baqylanady. Qoldanylǵan sharalardyń nátijesinde Jabaiy tuiaqty janýarlardyń sirek kezdesetin jáne joiylyp bara jatqan túrleri men kiikter sanynyń kóbeiip kele jatqany baiqalady», - dedi Nysanbaev.
