Májilis Spikeri Nurlan Nyǵmatýlinniń tóraǵalyǵymen Palatanyń Biýro otyrysy ótti. Onda aldaǵy jalpy otyrystyń kún tártibi naqtylandy, – dep habarlaidy ómengi palatanyń baspasóz qyzmeti.
Aldaǵy sársenbide Májilis depýtattary lotereialar jáne lotereia qyzmeti máselelerine qatysty zań jobasyn birinshi oqylymda talqylaidy dep kútilýde.
Sondai-aq, ekinshi oqylymda qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy is-qimyl máselelerine qatysty zań jobasyn nazarǵa alatyn bolady.
Osy kúni birqatar ratifikatsiialyq qujattar da talqylanady. Olardyń qatarynda 2006 jylǵy 6 qarashadaǵy Armeniiamen Tabys pen múlikke salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly úkimetaralyq konventsiia jáne oǵan Hattama sheńberinde Qazaqstan jáne Armeniia ýákiletti organdary bergen rezidenttikti rastaityn resmi qujattardy taný tártibi týraly notalar almasý nysanyndaǵy kelisimdi ratifikatsiialaý týraly, sonymen qatar, Braziliiamen sottalǵan adamdardy berý týraly shartty ratifikatsiialaýǵa qatysty zań jobalary bar.
Biýro otyrysynda Qazaqstannyń Tuńǵysh Prezidenti – Elbasy N.Á. Nazarbaevtyń 2017 jylǵy 31 qańtardaǵy Joldaýyn jáne Memleket basshysy Q.K.Toqaevtyń 2019 jylǵy 2 qyrkúiektegi Joldaýyn iske asyrý sheńberinde «Qalalyq jáne aýyldyq mektepterdegi orta bilim berýdiń sapasy. Problemalar jáne olardy sheshý joldary» taqyrybynda parlamenttik tyńdaý ótkizý máselesi de nazardan tys qalmady.
