Nurlan Nyǵmatýlin Venadaǵy parlamentter spikerleriniń besinshi dúniejúzilik konferentsiiasynda sóz sóiledi, dep habarlaidy "Ult aqparat".
Májilis tóraǵasy Nurlan Nyǵmatýlin parlamentter spikerleriniń Besinshi Dúniejúzilik konferentsiiasynda sóilegen sózinde Qazaqstan basshylyǵynyń aýqymdy reformalary, sondai-aq zańnamalyq qoldaý elimizdi halyqaralyq ustanymdarǵa sáikes damýyna múmkindik beretinin atap ótti.
Májilis tóraǵasy Nurlan Nyǵmatýlin bastaǵan parlamenttik delegatsiia osy kúnderi Avstriia astanasy Vena qalasynda ótip jatqan parlamentter spikerleriniń besinshi dúniejúzilik konferentsiiasyna qatysýda.
Májilis spikeri kópjaqty yntymaqtastyqty nyǵaitý, beibitshilik pen turaqty damýdy qamtamasyz etý úshin parlamenttik qyzmet taqyrybyna arnalǵan interaktivti jalpy pikirtalastarda sóz sóiledi.
Osy rette, Nurlan Nyǵmatýlin bizdiń elimizdiń halyqaralyq ustanymdarǵa sáikes turaqty damýǵa jol ashatyn Qazaqstanda qolǵa alynyp jatqan mańyzdy bastamalar týraly aitty.
Palata spikeri atap ótkendei, Qazaqstannyń Tuńǵysh Prezidenti Nursultan Nazarbaev yqpaldy memleket pen ádil qoǵam qurýdyń tujyrymdamalyq negizin qalady.
Osy saiasi baǵytty búginde Prezident Qasym-Jomart Toqaev jalǵastyryp keledi.
Nurlan Nyǵmatýlin qazaqstandyq qoǵamnyń barlyq salalaryn qamtityn aýqymdy júieli reformalardy sóz ete kelip, qoǵamdyq baqylaý men azamattyq belsendilikti, sonymen birge el basshylyǵynyń bastamalaryn zańnamalyq qoldaýǵa basa nazar aýdardy.
- Parlament reformalardy der kezinde zań deńgeiinde qamtamasyz ete otyryp, belsendi qyzmet atqarýda. Máselen, sailaý zańnamasy men sot júiesin jetildirýge birqatar mańyzdy zańdar qabyldandy. Sonymen birge, saiasi partiialar, beibit jinalystar, jergilikti ózin-ózi basqarý týraly zańnamalyq aktilerge de kóptegen ózgerister engizildi, - dedi Májilis Spikeri.
Óz sózinde Nurlan Nyǵmatýlin Qazaqstannyń jahandyq jáne óńirlik deńgeilerde beibitshilik pen qaýipsizdikti qamtamasyz etýge qosqan úlesine kóńil bóldi.
- Qazaqstan Prezidenti Qasym-Jomart Toqaev zamanaýi syn-qaterlerge bailanysty tikelei BUU Qaýipsizdik Keńesine esep beretin Biologiialyq qaýipsizdik jónindegi halyqaralyq agenttik qurýdy usyndy. Bul mamandandyrylǵan qurylym biologiialyq qaýipterdi boldyrmaýǵa yqpal etedi. Biz osy mańyzdy qazaqstandyq bastamany áriptesterimiz belsendi túrde qoldaidy dep senemiz, - dedi Májilis Spikeri.
Sonymen qatar, Nurlan Nyǵmatýlin halyqaralyq kún tártibindegi Aýǵanstandaǵy beibitshilik pen qaýipsizdikti qalpyna keltirý siiaqty ózekti másele týraly aita kelip, búgingi tańda eń mańyzdysy – Aýǵanstandaǵy gýmanitarlyq jáne azyq-túlik daǵdarysyna jol bermeý ekendigine nazar aýdardy.
Májilis spikeri qazirgi ýaqytta Qazaqstan Prezidentiniń sheshimi boiynsha Aýǵanstanǵa járdemdesý jónindegi BUU Missiiasy bizdiń elimizde ýaqytsha ornalastyrylǵanyn atap ótti.
Besinshi Dúniejúzilik parlamentter spikerleriniń konferentsiiasy koronavirýstyq pandemiia bastalǵannan beri tikelei uiymdastyrylyp otyrǵan alǵashqy aýqymdy parlamentshiler forýmy.
Venadaǵy konferentsiiany Parlamentaralyq odaq, Avstriia Parlamenti BUU-men birlesip uiymdastyrdy.
Álemniń 90-nan astam eliniń parlamentter spikerleri jinalǵan jiynda-pandemiiamen kúresý jáne covid-19-dan keiin qalpyna keltirý jónindegi jahandyq sharalardy qosa alǵanda, shuǵyl halyqaralyq parlamenttik is-qimyldy talap etetin basymdyqtar, klimattyń ózgerýi jáne ekologiialyq turaqtylyqty qamtamasyz etý máselelerin sheshý, jalǵa aqparat taratýǵa qarsy is-qimyl, jastardyń saiasatqa qatysýy, genderlik teńdik máseleleri qaraldy.
Qazaqstandyq Parlament ókilderi delegatsiiasynyń quramynda Senat pen Májilis depýtattary bar.
