Májilistiń jalpy otyrysynda tiisti zań jobasyn talqylaý barysynda aldaǵy ýaqytta interneti joq aýyldarda kásipkerlerdiń eseptiligin tek elektrondy nusqada tapsyrý qandai problemaǵa alyp keletini aityldy, dep habarlaidy QazAqparat tilshisi.
«Qazaqstan Respýblikasynyń keibir zańnamalyq aktilerine Qazaqstan Respýblikasyndaǵy kásipkerlik qyzmet salasynda jańa retteýshilik saiasatty engizý máseleleri boiynsha ózgerister men tolyqtyrýlar engizý týraly» zań jobasyn birinshi oqylymda talqylaý kezinde internet nashar eldi mekenderde kásipkerlik sýbektileri esepter men habarlandyrýdy elektrondy nusqada bere almasa qandai qadamdar jasalatyny suraldy.
«Depýtattar aqparattyq tetikter talaptaryn oryndaýdy qaǵaz jáne elektrondy nusqada saqtaý múmkindigi týraly túzetý engizidi. Depýtattardyń túzetýi boiynsha sizdiń kózqarasyńyz qandai?», - dep surady depýtat Vera Kim.
Óz kezeginde Ulttyq ekonomika ministri Áset Erǵaliev depýtattar usynysyn qoldaitynyn aitty.
«Esepterdi tapsyrý formasy qaǵaz ári elektrondy nusqada bolýy kerek dep sanaimyz. Eger sapaly internet qoljetimdi bolmasa, onda kásipker eseptilikti qaǵaz nusqada da tapsyra alýy kerek», - dedi ministr.
Osy turǵyda Májilis tóraǵasy Nurlan Nyǵmatýlin zań jobasyn pysyqtaý kezindegi ministrlik men «Atameken» palatasynyń bul baǵyttaǵy qadamdaryn synǵa aldy.
«Sony Parlamentke kelip túsindińiz be? Búgin eseptiliktiń eki formasyna qatysty depýtattardyń pozitsiiasyn qoldap otyrsyzdar. Zań jobasy daiyndalǵan kezde nege tek elektrondy nusqany qaldyrý kerektigin qoldadyńyzdar?! Bul neǵylǵan pozitsiia, kásipkerler múddesin qorǵamai palata qaida qarap otyr? Kásipkerler nashar internetimen eseptilikti qalai júrgizedi? Árine, tsifrlyq eseptilikke kóshý talaby eshqandai kúmán týdyrmaidy, biraq bul baǵytta tiisti daiyndyq kerek. Eń aldymen, barlyq eldi mekender turaqty internetke qol jetkizip alýy tiis. Eger sapaly internet bolmasa, tolyqtai tsifrly eseptilikke kóshý problema týdyratyny túsinikti ǵoi. Interneti nashar aýyldar bar ekeni belgili. Ekinshiden, keibir kásipkerler elektrondyq nusqada eseptilikti tapsyrýǵa daiyn emes shyǵar. Mysaly, aýyldaǵy shaǵyn dúkendi alsaq, ol dúkende bir ǵana adam jumys isteidi. Onyń iesi de, satýshysy da, býhgalteri de sol kisi. Eger onyń elektrondy tehnikasy bolmasa, tsifrly qujattarmen qalai jumys isteidi. Al endi ministrlik usynysyna qarasaq, osy eseptilikti ýaqytyly tapsyrmasa, atalǵan kásipker jaýapkershilikke tartylady», - dep toqtaldy Májilis tóraǵasy.
Osy oraida N. Nyǵmatýlin aýyldarǵa sapala internet jetpese, eseptiliktiń qaǵaz nusqasynan bas tartyp, tek elektrondy nusqany engizý dúrbeleń týdaratynyn aitty.
«Ministr myrza, osyndai qujatty ázirlep, Parlamentke engizgen kezde neni oilaisyzdar?! Eger kásipkerlerge osyndai talaptardy engizseńizder, onda ózderińizge de joǵary talap qoiyńyzdar. Aldaǵy ýaqytta barsha eseptilik tsifrlyq sipatta bolatynyn jaqsy túsinemiz jáne osy formatty qoldaimyz. Degenmen tiisti jaǵdai jasaý kerek. Tek osydan keiin bul formatqa kóshken jón», - dedi Májilis tóraǵasy.
Talqylaýdan keiin, zań jobasyn ekinshi oqylymǵa deiin qaraý kezinde tiisti qadamdardy pysyqtaý tapsyryldy.
