Májilis tóraǵasy Nurlan Nyǵmatýlin Ulttyq ekonomika ministrligi usynǵan kásipkerlik qyzmetti retteýdi jetildirý máseleleri boiynsha zań jobasyn ekinshi oqylymǵa deiin jiti zertteýdi tapsyrdy, dep habarlaidy QazAqparat tilshisi.
Aita ketsek, Ulttyq ekonomika ministri búgingi Parlament Májilisiniń otyrysynda QR Ulttyq ekonomika ministri Timýr Súleimenov kásipkerlik qyzmetti retteýdi jetildirý máseleleri týraly zań jobasy boiynsha baiandama jasaǵan bolatyn. Ministr Qazaqstanda biznesti memlekettik qadaǵalaýdyń jańa institýtyn engizýdi usyndy. Usynys boiynsha tyń institýttyń qazirgi qoldanystaǵy júieden artyqshylyǵy - ákimshilik óndirissiz quqyq buzýshylyqtyń aldyn alý men eskertý bolyp tabylady.
«Zań jobasyn qaradym. Timýr Serikuly (QR Investitsiialar jáne damý vitse ministri -avt.) men bilsem qurylystyń barlyq standarttaryna sizder jaýaptysyzdar. Solai ǵoi... Qarańyzdar, jeke turǵyn úi salýda barlyq qadaǵalaýdy alyp tastaýdy surap otyrsyzdar. Álbette, Ulttyq ekonomika ministrligi sizderdi qysyp, reitingte ósýdi oilap otyrýy múmkin. Ár túrli ministrlikter de eki-úsh baqylaýdy alyp tastaýdy kózdeýi yqtimal», - deidi Májilis tóraǵasy.
Nurlan Nyǵmatýlin paiymyn shegelei tústi.
«Zań jobasy aiasynda biz jeke turǵyn úi salýda barlyq qadaǵalaýdy alyp tastadyq delik. Meniń túsinbei turǵanym - memlekettik úilerdi salyp jatyrmyz, onda bizdiń azamattar turyp jatyr. Biz olardyń qaýipsizdigin oilap otyrmyz. Al jeke turǵyn úilerde turǵandar - bizdiń azamattar emes pe!? Bizde munda Tótenshe jaǵdailar boiynsha vitse-ministr bar ma? Al sizder buǵan qalai qaraisyzdar? Erteń birdeńe bolyp jatsa, sizder ol orynǵa kelip alyp, kezinde qurylystyń durys júrgizilmegenin alǵa tartasyzdar ǵoi...», - dep Nurlan Nyǵmatýlin QR IIM Tótenshe jaǵdailar komitetine saýal joldady.
Óz kezeginde QR Ishki ister ministriniń orynbasary Iýrii Ilin zań jobasyn ázirleý jumysyna óz vedomstvosynyń múlde qatyspaǵanyn alǵa tartty.
«Mine kórdińizder me? Kelesi jaǵdaidy keltireiin. Jeke turǵyn úi degen neni bildiredi? Bir nemese eki qabatty úi bolsa birsári. Kúni erteń toǵyz qabatty jeke turǵyn úiler de baqylanbaityn sanatqa kirip ketýi múmkin. Ol da ainalyp kelgende baqylaý júrgizýden tys qalady. Aqyr aiaǵy ne bolady? Kúni erteń olar «kartondy úiler» bolyp shyǵa kelgende biz bolsaq «reitingti qýyp olardan baqylaýdy alyp tastaǵanbyz» dep aitamyz ba?! Timýr Serikuly bálkim ekinshi oqylymǵa deiin zań jobasyn qaita qaraý kerek shyǵar. Reitingti qýyp, ásirese seismikalyq qaýipti aimaqtardaǵy qurylysty qadaǵalaýdan qalyp qalmaiyq», - dep túidi Májilis tóraǵasy.
