Májilis Spikeri Nurlan Nyǵmatýlinniń tóraǵalyǵymen ótken jalpy otyrysta depýtattar «Sailaý týraly» Konstitýtsiialyq zań jobasyna engizilgen túzetýlerdi maquldady, dep habarlaidy QazAqparat.
Zań jobasy boiynsha, ákimdikke kandidattardy saiasi partiialarmen de, azamattardyń ózin-ózi usyný tártibimen de berý kózdeledi.
Kandidattardy tirkeý, kandidatýrany alyp tastaý tártibi, ákimdi sailaý kezinde daýystardy sanaý, osy sailaýdyń qorytyndylaryn anyqtaý jáne jariialaý tártibi belgilenedi.
Zań jobasymen barlyq deńgeidegi sailaýda beriletin biýlletenderge «barlyǵyna qarsy» baǵan engiziledi. Saiasi partiialar úshin Parlament Májilisine ótý shegi tómendetiledi. Sondai-aq, zań jobasynda aýdandyq mańyzy bar qalalardyń, aýyldardyń, aýyldyq okrýgterdiń ákimderin tikelei sailaýǵa qatysty normalar qamtylǵan.
Osy rette, Májilis Tóraǵasy Nurlan Nyǵmatýlin:
- Zań jobasy tikelei Memleket Basshysy Qasym-Jomart Kemeluly Toqaevtyń tapsyrmasyna sáikes ázirlendi. Onda Prezidentimizdiń saiasi partiialarǵa jáne sailaýda beriletin biýlletenge qatysty usynystary engizildi. Sonymen birge, aýyldyń, aýyldyq okrýgterdiń ákimderin tikelei sailaýdy, qamtamasyz etetin jańa normalar qabyldandy. Osynyń barlyǵy Memleket Basshysynyń saiasi jańǵyrtý bastamalaryn zań jaǵynan qoldaýǵa arnalǵan taǵy bir naqty qadam, - deýge bolady dedi.
Májilis Tóraǵasynyń aitýynsha, ol eń aldymen, memlekettik organdar men halyq arasyndaǵy bailanysty kúsheitýge jáne ákimderdiń turǵyndar aldyndaǵy jaýapkershiligin nyǵaitýǵa jańa serpin beretin bolady. Bul óte mańyzdy másele. Sebebi, jergilikti halyqpen tikelei bailanys ornatatyn negizgi tulǵa ol - árine aýyldyń ákimi.
Sonymen birge, bul zań jobasy aýyl azamattarynyń saiasi belsendiligin odan ári arttyrýǵa da zor yqpal etetini sózsiz.
