Parlament Májilisiniń jalpy otyrysynda Qazaqstan Respýblikasynyń keibir zańnamalyq aktilerine parlamenttik oppozitsiia máseleleri boiynsha ózgeris pen tolyqtyrýlar engizý týraly» zań jobasy maquldandy, dep habarlaidy QazAqparat.
Májilis Tóraǵasy Nurlan Nyǵmatýlin qujat jobasy Memleket basshysy Qasym-Jomart Toqaevtyń tapsyrmasymen ázirlengenin eske saldy.
«Osyǵan orai, Májilis depýtattary bastamashy bolǵan osy zań jobasynda alǵash ret «parlamenttik oppozitsiia» degen uǵym engizildi. Bul Parlament tarihynda buryn bolmaǵan, biraq ta, ýaqyt talabyna sai jasalyp otyrǵan óte qajetti qadam. Sebebi, Parlamenttik oppozitsiia - demokratiiany odan ári nyǵaitýǵa, Parlament jumysyn damytýǵa, sonymen birge, ashyq jáne erkin qoǵamdy qamtamasyz etýge yqpal etetin bolady. Sondyqtan, damyǵan elderdiń tájiribesin eskere otyryp, osy zań aiasynda, tiimdi parlamenttik oppozitsiia qalyptastyrý kerek dep esepteimiz», - dedi Nurlan Nyǵmatýlin.
Zań jobasynyń negizgi maqsaty - parlamenttik oppozitsiia institýtyn qalyptastyrýdy retteý salasynda quqyqtyq negizderdi qamtamasyz etý bolyp tabylady.
Zań jobasyna sáikes, parlamenttik oppozitsiiaǵa óz depýtattarynyń arasynan QR Parlamenti Májilisi turaqty komitetteriniń tóraǵalary laýazymyna kandidatýra usyný quqyǵy beriledi.
Depýtat Azat Perýashevtiń aitýynsha, turaqty komitetterdiń biriniń tóraǵasy parlamenttik oppozitsiia depýtattarynyń arasynan sailanatyny týraly erejeni bekitý usynylady.
Jumys toby aiasynda zań jobasyn talqylaý kezinde depýtattar túzetýler engizdi. Bul túzetýlerge sáikes, parlamenttik oppozitsiia Parlament Májilisi turaqty komitetteriniń hatshylary laýazymyna kandidatýra usynýǵa da quqyly bolady. Bul rette, eki turaqty komitettiń hatshylary parlamenttik oppozitsiia usynǵan depýtattar arasynan sailanady.
«Usynylyp otyrǵan joba parlamenttik oppozitsiia qyzmetiniń jáne partiialyq pikirtalastardyń berik kepildigin qalyptastyryp, eldiń demokratiialyq damýynda edáýir qadam bolady dep sanaimyz. Memleket basshysyna mańyzdy saiasi sheshim qabyldaǵany úshin, zań jobasyn talqylaýǵa qatysqan azamattar men sarapshylarǵa, sonymen birge jumys toby múshelerine alǵysymyzdy bildiremiz», dedi Azat Perýashev.
Budan buryn habarlanǵandai, búgin Parlament Májilisiniń jalpy otyrysynda «Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy maquldandy.
Zań jobasynyń negizgi maqsaty - qoldanystaǵy zańnamada «parlamenttik kópshilik» jáne «parlamenttik oppozitsiia» uǵymdaryn bekitý boiynsha quqyqtyq negizderdi qamtamasyz etý.
