Parlament Májilisiniń tóraǵasy Nurlan Nyǵmatýlin 2019 jyldaǵy palata depýtattarynyń negizgi jumysyn atady, dep habarlaidy QazAqparat.
«Birneshe kúnnen keiin barshamyz jańa 2019 jyldy qarsy alamyz. Jańa jyl - árqashan jańa josparlarǵa, biik maqsattarǵa jol ashatyn, sondai-aq atqarylǵan isterdi qorytyndylaityn erekshe kezeń. Osy jolda biz sessiia bastalǵan tórt aidyń ishinde Elbasynyń tapsyrmasyna sáikes, elimizge, halqymyzǵa qajetti birqatar zań jobalaryn maquldadyq. Sonyń ishinde qasietti Túrkistan oblysy jáne Shymkent qalasynyń aldaǵy damý jospary konstitýtsiialyq zańmen bekitildi. Ekonomikalyq áleýmettik salalarǵa serpin beretin elimizdiń negizgi qarjy qujaty - úsh jyldyq biýdjet maquldandy. Sonymen birge, Májiliste densaýlyq saqtaý, kásipkerlikti qoldaý, jumyspen qamtýǵa arnalǵan máseleler boiynsha kóptegen mańyzdy sharalar atqaryldy», - dedi N. Nyǵmatýlin Májilistiń jalpy otyrysynda.
Osy oraida ol kezekti sessiia aiaqtalmaǵanyn, búginde Májilis qaraýynda taǵy da 40-tan astam zań jobasy bar ekenin eske saldy.
«Osy qujattardyń barlyǵyn sessiianyń sońyna deiin talqylap, joǵary deńgeide qabyldaýymyz kerek. Sebebi Prezidenttiń tapsyrmalaryn árqashan sapaly zańdarmen qamtamasyz etý - bizdiń basty maqsatymyz. Sondyqtan barlyq fraktsiialar, barsha depýtattar birlesip, tiimdi ári belsendi, nátijeli qyzmet atqarýymyz qajet», - dedi Májilis tóraǵasy.
Budan buryn habarlanǵandai, 2018 jyldaǵy Májilistiń sońǵy jalpy otyrysynda «Qazaqstan Respýblikasynyń keibir zańnamalyq aktilerine biznes-ortany damytý jáne saýda qyzmetin retteý máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldady.
Sonymen qatar, Májilis Armeniianyń Premer-Ministrine qatysty qujatty talqylady.
