Búgin Májilis Spikeri Nurlan Nyǵmatýlinniń tóraǵalyǵymen Palata Biýrosy ótip, onda aldaǵy jalpy otyrystyń kún tártibi naqtylandy, dep habarlaidy "Ult aqparat" Parlament Májilisiniń baspasóz qyzmetine silteme jasap.
Biýro otyrysynda depýtattar qaraýyna Qazaqstan Respýblikasyndaǵy Adam quqyqtary jónindegi ýákil týraly jáne oǵan ilespe zań jobalary birinshi oqylymda usynylady. Adam quqyqtary jónindegi ýákil qyzmetiniń máseleleri boiynsha Ákimshilik quqyq buzýshylyq týraly jáne Salyq kodeksterine ózgerister men tolyqtyrýlar engizý kózdelip otyr.
Kún tártibiniń jobasynda janýarlarǵa jaýapkershilikpen qaraý týraly zań jobasyn birinshi oqylymda ilespe túzetýlerimen qaraý qarastyrylǵan. Sondai-aq, birinshi oqylymda Ákimshilik quqyq buzýshylyq týraly kodekske janýarlarǵa jaýapkershilikpen qaraý máseleleri boiynsha túzetýler engizý týraly josparlanǵan.
Osy zań jobasynyń negizgi mindetteri - janýarlarǵa qaraý kezinde jalpy jáne arnaiy talaptar belgileý, janýarlardy qatygezdik tanytýdan, azap pen qyrylýdan qorǵaý, janýarlardy qatygezdikpen óltirýge jol bermeý, qoǵamnyń adamgershiligi men izgiligin nyǵaitý, qańǵybas janýarlardyń sanyn retteý salasyndaǵy aqparattyń qaýipsizdigin, ashyqtyǵyn, azamattardyń ózge de quqyqtary men zańdy múddelerin qamtamasyz etý bolyp tabylady.
Sonymen qatar, Májilistiń beiindi komitetteri aldaǵy jalpy otyrysta Qazaqstan Respýblikasynyń halyqaralyq sharttary týraly zań jobasyn jáne Salyq jáne biýdjetke tólenetin basqa da mindetti tólemder týraly Salyq kodeksin jumysqa alady.
