Búgin Májilistiń jalpy otyrysynda balanyń quqyqtaryn qorǵaý máselelerine qatysty depýtattardyń bastamasymen ázirlengen zań jobasy birinshi oqylymda maquldandy, dep habarlaidy "Ult aqparat".
Otyrys barysynda depýtattar men memlekettik organ ókilderi balalardyń quqyqtaryn qorǵaýǵa qatysty pikir almasyp, zań jobasyn jan-jaqty talqylady.
Májilis tóraǵasy Nurlan Nyǵmatýlin depýtattardyń bastamasymen ázirlengen zań jobasynda balalardyń turǵyn úi jáne otbasylyq jaǵdaida múddelerin qorǵaýǵa, qadaǵalaýsyz jáne panasyz qalýdyń aldyn alý máseleleri qarastyrylǵanyn atap ótti.
Nurlan Nyǵmatýlinniń aitýynsha, sonyń ishinde, býlling pen kiberbýlling qoǵamda qatty alańdaýshylyq týdyryp otyr.
Balalardy osy qaýipten qorǵaityn naqty normalar qajet.
Málimetke júginsek, 18 jasqa deiingi jastar arasynda ótken jyly 143 sýitsid jáne 306 óz-ózine qol jumsaýǵa áreket etý jaǵdaiy bolǵan.
Tek jarty jyldyń ishinde 105 sýitsid pen 193 ózine qol suǵý áreketi bolǵan.
- Shynymen býlling jáne kiberbýlling degen – ol óte qaýipti nárse. Ol balalardyń psihologiiasyn buzatyn, sýitsidke alyp baratyn jol. Sondyqtan, jańa aityp ketkendei, balalardy, ásirese, mektep balalardy, býlling jáne kiberbýllingten tolyqtai qorǵaityn naqty normalar engizýimiz kerek. Osyǵan bailanysty, ekinshi oqylymǵa deiin tiisti jumys ótkizý qajet, - dedi Palata spikeri.
Nurlan Nyǵmatýlinniń aitýynsha, bul zań jobasy qazirgi qoǵamǵa qajetti kóptegen máselelerdi, ásirese, balalardyń quqyǵyn qorǵaý jolyndaǵy problemalardy sheshýge tiis.
Palata spikeri atap ótkendei, qazir balalardy qorǵaý úshin otbasylyq qatynastar, bilim berý, densaýlyq saqtaý salalarynda qosymsha sharalar qarastyryldy.
Zań jobasynda jazylǵan normalar, sonyń ishinde internette azamattardy, ásirese, balalardy osyndai býlling jáne kiberbýlling siiaqty qubylystardan qorǵaý kerek.
Bul normalar zaman talaby ekenin aitqan Nurlan Nyǵmatýlin osy zań jobasy Memleket basshysy Qasym-Jomart Kemeluly Toqaevtyń azamattardy internet arqyly qysym kórsetýden zań deńgeiinde qorǵaý jónindegi tapsyrmasyn oryndaýǵa baǵyttalǵanyn .aitty.
Sonymen qatar, Májilis tóraǵasynyń pikirinshe, bir ǵana zań jobasymen balalardyń quqyqtaryn qorǵaý salasyndaǵy problemalardy sheshý múmkin emes.
- Bul jerde, árine, júieli sharalar, keshendi tásilder qajet. Ol úshin, barlyq múddeli memlekettik organdardyń, pedagogtar men ata-analar qaýymynyń birlesken jumysy qajet. Al, depýtattyq korpýs óz tarapynan balalardyń quqyqtaryn qorǵaý tetigin jetildirý boiynsha zańnamalyq jaǵynan qoldaý kórsetýge daiyn, - dedi Nurlan Nyǵmatýlin.
Aita ketý kerek, zań jobasymen jumys isteý barysynda balalardyń turǵynjaiǵa quqyqtaryn qamtamasyz etýge, sondai-aq otbasylyq qatynastarda balanyń múddelerin qorǵaýǵa jáne internet jelisindegi quqyqqa qarsy kontenttiń aldyn alýǵa arnalǵan birqatar normalar qarastyryldy.
