Búgin Májiliste palata tóraǵasy Nurlan Nyǵmatýlin Armeniia Respýblikasynyń Prezidenti Armen Sarkisianmen kezdesti, dep habarlaidy "Ult aqparat".
Nurlan Nyǵmatýlin Armeniia Prezidentiniń elimizge eki memleket táýelsizdiginiń 30 jyldyǵyna arnalǵan memlekettik saparynyń mańyzdylyǵy týraly aitty.
Sonymen qatar, Májilis tóraǵasy Armeniia Prezidenti Qazaqstannyń Tuńǵysh Prezidenti, Elbasy Nursultan Nazarbaevpen, sondai-aq Memleket basshysy Qasym-Jomart Toqaevpen kelissózder barysynda qol jetkizilgen ýaǵdalastyqtardy is júzinde júzege asyrý úshin saiasi dialogty jáne Qazaqstan-Armeniia arasyndaǵy jan-jaqty ózara is-qimyldy nyǵaitýǵa yqpal etetinine senim bildirdi.
Májilis tóraǵasynyń aitýynsha, qazaqstandyq parlamentshiler bul úshin qajetti zańnamalyq kómek kórsetedi.
Óz kezeginde, Armeniia Prezidenti elimizdiń jahandyq úderisterdegi rólin atap ótip, Qazaqstannyń basty jetistikteriniń biri – ultaralyq jáne konfessiiaaralyq kelisimdi atady.
Armen Sarkisian atap ótkendei, Qazaqstan – Eýraziialyq ideianyń negizin qalaýshy jáne Ortalyq Aziiadaǵy ǵana emes, Eýraziialyq keńistiktegi saiasi ortalyqqa ainalǵan memleket.
«Qazaqstan – Tuńǵysh Prezident Nursultan Nazarbaev negizin qalaǵan, al búginde Memleket Basshysy Qasym-Jomart Toqaev dástúrli túrde jalǵastyryp kele jatqan Ortalyq Aziiada ǵana emes, jalpy óńirde bolyp jatqan barlyq úderisterdiń belsendi qatysýshysy bolyp tabylatyn el», - dedi Armen Sarkisian.
Qazaqstan-Armian yntymaqtastyǵy týraly aita kele, Armeniia Prezidenti Qazaqstandy UQShU, EAEO jáne basqa da halyqaralyq uiymdardaǵy jaqyn seriktes el dep atady. Bul rette, Armen Sarkisian odan ári ózara is-qimyl úshin, onyń ishinde parlamentaralyq bailanystyń mańyzdylyǵyn da atap ótti.
Nurlan Nyǵmatýlin saiasi júieni reformalaý, azamattyq qoǵamdy damytý jáne Memleket basshysynyń bastamasy boiynsha otandyq zańnamaǵa engizilgen ózgerister týraly aitty. Onyń ishinde, saiasi partiialardyń Parlamentke ótý shegin tómendetý, sailaý biýlletenderine «barlyǵyna qarsy» baǵanyn engizý bekitilgen «Qazaqstan Respýblikasyndaǵy sailaý týraly» Zańǵa engizilgen ózgerister.
Sonymen qatar, Májilis tóraǵasy Qazaqstan Armeniiamen jan-jaqty qarym-qatynastardy damytýǵa zor mán beretinin jáne Ońtústik Kavkaz óńirindegi senimdi seriktes memleket ekenin atap ótip, armiandyq áriptesterimen TMD Parlamentaralyq Assambleiasy men EQYU jáne UQShU Parlamenttik assambleialary jáne basqa da birlestikter alańynda tyǵyz ózara is-qimyl ornyqqanyna nazar aýdardy.
Nurlan Nyǵmatýlin zań shyǵarý jumysynda tájiribe almasý jáne Qazaqstan men Armeniia arasyndaǵy seriktestikti nyǵaitý maqsatynda armian parlamentshilerimen Palata komitetteri men yntymaqtastyq toptary deńgeiinde bailanystardy jandandyrýǵa nietti ekenin aitty.
