Endi Qazaqstanda bir adam advokattar alqasyn qazirgidei 25-30 jyl basqara almaidy. "Advokattyq qyzmet jáne zań kómegi týraly" zań jobasynda tóraǵalyq laýazymda bolý merzimin shekteitin norma engizilip otyr, dep habarlaidy Sputnik Qazaqstan tilshisi.
Jańa zań jobasyna sáikes advokattar alqasynyń tóraǵasy bir merzimge ǵana sailanady, al bul tórt jyl. Ádilet ministri Marat Beketaev nege osyndai normany engizý qajet bolyp otyrǵanyn túsindirdi.
"Bul halyqaralyq tájiribe. Shetelde advokattar alqasynyń tóraǵasyna jalaqy tólenbeidi nemese ol simvoldyq mándegi eńbekaqy alady. Osy ýaqytta tóraǵa advokattyq qyzmet usynbaidy, jalaqysy joq, sondyqtan bir-eki jyldan keiin ornyn bosatyp, advokattyq qyzmetin jalǵastyrady. Al bizde tóraǵa jalaqy alady. Ókinishke qarai, biz osyndai usynys jasaýǵa májbúr boldyq. Óitkeni advokattar alqasy jumysynyń tiimdiligi tómen", — dedi ministr búgin májilistiń jalpy otyrysynda.
Óz kezeginde májilis tóraǵasy Nurlan Nyǵmatýlin bul bastamaǵa qoldaý bildirdi.
"Bizde zańgerlik qyzmet, zańgerlik kómek kórsetýdiń sapasy týraly únemi aityp júrmiz. Bul sapa qaidan bolsyn? Óńirlerde advokattar alqasyn bir adam ondaǵan jyl basqaryp otyr emes pe?! Máselen, Mańǵystaý oblysynda advokattar alqasynyń tóraǵasy 25 jyl, Almaty oblysynda 27 jyl, Atyraý oblysynda 31 jyl otyr. Al Aqtóbe oblysyndaǵy tóraǵa bárinen asyp tústi – 33 jyl. Bul degenimiz ne? Iaǵni, azamaattarǵa zańgerlik qyzmet kórsetý salasynda básekelestik múldem joq degen sóz. Olar óz isiniń sheberi shyǵar. Tájiribeli mamandar ekeni daýsyz. Biraq qazir zaman basqa", — dedi tóraǵa.
Ol búgingi kúni básekelestik kóp máseleni sheshetinin aitty. Sonda ǵana qyzmet sapasyn jaqsartýǵa ynta bolady.
"Advokattar qoǵamdastyǵyndaǵy básekelestik olardyń biliktiligin kóterýge de yqpal etedi. Ekinshi jaǵynan, azamattarǵa tańdaý jasaýǵa múmkindik beredi. Sondyqtan bul normany qabyldaý kerek. Maǵan áli kúnge deiin hat jazady. Óńirlerdegi, respýblikalyq advokattar qoǵamdastyǵy muny jasamaý kerek dep óz dálelderin aityp otyr. Biraq bul álemdik tájiribe, bizge alǵa ilgerileý qajet", — dep túidi sózin Nyǵmatýlin.
Májilis depýtattary zań jobasyn búgin birinshi oqylymda maquldady.
