Senator Nurjan Nursipatov Premer-Ministr Álihan Smaiylovtyń atyna joldaǵan depýtattyq saýalynda Qazaqstannyń Qarýly Kúshterinde aýtsorsingti qoldaný máseleleri týraly aitty, dep habarlaidy QazAqparat.
Senator tótenshe jaǵdai kezinde áskerlerdi úzdiksiz qamtamasyz etý buzylǵan faktiler baiqalǵan qańtar oqiǵasy kúnderinde kúsh qurylymdarda aýtsorsingti qoldaný eleýli qaýip-qater tóndiretinin aiqyn kórsetkenin atap ótti.
«Mysaly, «QazMunaiGaz-Aero» munai ónimderin jetkizý jónindegi biryńǵai operator sol kezeńde eldiń áýejailarynda, onyń ishinde astanada temperatýra tómen bolǵan kezde áleýetti organdardaǵy áýe kúshteri aviatsiialyq otynynyń qatyp qalý múmkindigin azaitýǵa arnalǵan kristaldanýǵa qarsy suiyqtyqpen qamtamasyz ete almady», - dedi ol.
Senator kótergen taǵy bir másele – Qarýly Kúshterdi sapasyz azyq-túlikpen qamtamasyz etý bolyp otyr. Tótenshe jaǵdai kezinde elordada áskeri qyzmetshilerdiń ishek joldarynyń jappai ýlaný faktileri tirkeldi. Eger este bolsa, tamaq berýdi uiymdastyrý jónindegi qyzmetterdi satyp alǵan merdigerdiń kinásinen qoǵamdyq tártipti qamtamasyz etýge jaýapty elýden astam áskeri qyzmetshi aýrýhana tósegine jatýyna týra keldi.
«Mundai jaǵdai, ókinishke qarai, kommertsiialyq qurylymdar eń aldymen paida tabýǵa jáne shyǵyndardy azaitýǵa múddeli ekenin kórsetedi jáne ol bir ret qana bolyp otyrǵan joq. Bul áskerdiń jaýyngerlik daiyndyǵyn qamtamasyz etýge teris áser etedi. Keibir jaǵdaida bul qamtamasyz etýdiń burynǵy daǵdysyna májbúrli túrde oralýǵa ákeledi», - dedi depýtat.
Senator Nurjan Nursipatov osyǵan bailanysty Ministrler Kabinetiniń basshysynan Qarýly Kúshterdegi, basqa da áskerler men áskeri quralymdardaǵy aýtsorsingtiń qazirgi júiesine keshendi taldaý júrgizýdi, sondai-aq turaqty jaýyngerlik ázirlikti qamtamasyz etýge qatysy joq qurylymdarda aýtsorsing qyzmeti saqtalatyn kúshtik organdarǵa materialdyq-tehnikalyq qamtamasyz etýdi júzege asyrýdyń aralas qaǵidatyn engizýdi surady.
