Búgin QR Eńbek jáne halyqty áleýmettik qorǵaý ministri Birjan Nurymbetov 8 adamdy qabyldady. Olardyń ishinde Nur-Sultan, Shymkent jáne Qaraǵandy qalalarynyń turǵyndary bar, dep habarlaidy "Ult aqparat".
Ministrlik baspasóz qyzmetiniń málimetinshe, Birjan Nurymbetovtiń qabyldaýynda bolǵan azamattar múgedektikti qaita belgileý, jumysqa ornalasý, zeinetaqylar men áleýmettik tólemder berý, múgedekterdi áleýmettik qamsyzdandyrý, jalaqy tólemeý jáne jumysshylardyń eńbek quqyqtarynyń buzylýy siiaqty máselelerdi kótergen.
«Birjan Nurymbetov azamattardyń ótinishteri men usynystaryn muqiiat tyńdap, barlyǵyna tolyqqandy jaýap berdi. Ministr qaraýǵa qosymsha ýaqyt talap etetin máselelerdi jeke baqylaýyna aldy. Sondai-aq Birjan Nurymbetov Eńbek, áleýmettik qorǵaý jáne kóshi-qon komiteti men ministrlik departamentteriniń basshylaryna azamattardyń máselelerin qoldanystaǵy zańnama aiasynda sheshýge kómektesýdi tapsyrdy», - delingen vedomstvo habarlamasynda.
