42 500 teńgege ótinish bergenderdiń ishinde ómirinde eshqashan bankte esepshot ashpaǵan adamdar bar. Bul týraly Ortalyq kommýnikatsiialar qyzmetinde ótken onlain brifingte aityldy, dep habarlaidy "Ult aqparat".
«Ótinish bergen adamdarǵa 42 500 teńgeni aýdarýymyz kerek, sondyqtan ótinish bergen kezde esepshotty kórsetý kerek. Ótinish bergenderdiń ishinde ómirinde eshqashan esepshot ashpaǵan adamdar bar. Olar ótinish toltyrǵan kezde esepshotty kórsetýi kerek, biraq olar ótinish jiberip úlgermei qalmas úshin esepshot ashý maqsatynda bankterge júginip jatyr. Osyǵan bailanysty 1-2 kúnde mynadai ózgeris engizemiz: ótinish bergen kezde bankte shotyńyz bolmasa, shotty kórsetetin jerge eshteńe kórsetpeisiz. Talapqa sai bolǵan jaǵdaida sizge 42 500 teńge taǵaiyndap, siz esepshot ashqansha 1 ai kútemiz. Esepshotty ashqannan keiin sizge tólemdi aýdaramyz. Ótinishińizdi jiberip qoiyp, esepshotyńyzdy asyqpai alýǵa bolatyn jaǵdai qarastyryp jatyrmyz. Bul 1-2 kúnde sheshiledi», - deidi QR Eńbek jáne halyqty áleýmettik qorǵaý ministri Birjan Nurymbetov.
Ol bankterge úndeý jasaǵysy keletinin aitty.
«Barlyq bankke aitarym, osyndai qiyn kezeńde biz sekildi halyqtyń ótinishin bir terezeden – qashyqtan qabyldap, olardyń málimetterin alyp, esepshotyn engizip, kartochkasyn ázirlep, úiine jetkizip berýge bolady. Qazir Qazposhta da, Halyq banki de sonymen ainalysyp jatyr. Basqa bankterdi de bizben birlesip, halyqqa kómektesý maqsatynda osyndai áreket jasaýǵa shaqyramyn», - deidi ol.
