Senator Nurtóre Júsip mamandar tapshylyǵynan zardap shegip otyrǵan balalar kardiohirýrgiiasy salasyna qatysty sheshimin tappaǵan birqatar ózekti máseleni kóterdi, dep habarlaidy "Ult aqparat".
Depýtattyń aitýynsha, júrek reanimatsiiasy men qarqyndy terapiia bólimindegi naýqastarda dári-dármekter, atap aitqanda qosymsha antibiotikter, immýndyq jáne basqa dáriler, sondai-aq qymbat MRT apparattary jetispeidi.
«Qazirgi ýaqytta 7 qaladaǵy kardiohirýrgiialyq 10 ortalyqta balalardyń júrek aqaýyna operatsiia jasaý múmkindigi bar. 2020 jyly 18 jasqa deiingi balalar arasynda ashyq júrekke - 1627, onyń ishinde 1 jasqa deiingi - 1128 balaǵa, 271 nárestege operatsiia jasalǵan. Operatsiia jasaý barysynda hirýrgter kóp jaǵdaida shuǵyl sheshim qabyldaidy. Al bul – úlken jaýapkershilik. Jalaqysy tómen, jaýapkershiligi joǵary bolǵan soń jas kardiohirýrgter bul mamandyq boiynsha turaqtap istemeidi», - dedi Nurtóre Júsip Úkimet basshysynyń atyna joldaǵan depýtattyq saýalynda.
Senator elimizde balalar aritmologtary, balalar kardiohirýrgi, perfýziolog mamandarynyń jetispeitinin atap ótti. Ol osy mamandyqtardyń mártebesin, sonymen birge jalaqysyn kóterý qajet dep otyr.
Depýtattyń sózine qaraǵanda, kepildendirilgen meditsinalyq kómek aiasynda kórsetiletin qyzmetterge tariftik saiasatty qaita qaraý mańyzdy.
Nurtóre Júsip jetispei otyrǵan meditsinalyq kadrlardy daiarlaý máselelerin jedel sheshý, halyqaralyq master-klastar ótkizý jáne ozyq elderdiń tájiribesinen sabaq alý qajet dep qosty. Materialdyq-tehnikalyq bazany nyǵaitý jáne klinikalardy qamtamasyz etý, logistikany jaqsartý jáne diagnostika men emdeýdiń klinikalyq praktikasyna zamanaýi meditsinalyq tehnologiialardy engizýdi jedeldetý mańyzdy.
