QR Parlamenti Senatynyń deptýtaty Nurtóre Júsip Eýropa Parlamentiniń Qazaqstanǵa qatysty arnaiy qararyna qatysty pikir bildirdi, dep habarlaidy QazAqparat.
«Frantsiianyń Strasbýrg qalasynda Eýropa Parlamentiniń biylǵy alǵashqy plenarlyq otyrysy ótken eken. Sol otyrysta Qazaqstandaǵy qańtar oqiǵalary talqylanyp, Eýropa Parlamenti Qazaqstanǵa qatysty arnaiy qarar qabyldapty. Bul birjaqty qabyldanǵan qarar. Alysta otyryp, bizdiń elimizde oryn alǵan oqiǵalar týraly bulai syrttan ton pishý durys emes. Aldymen eldegi jaǵdaidyń qandai bolǵany, oqiǵalardyń qalai órbigeni jóninde ártúrli aqparat kózderinen shynaiy aqparat alý qajet edi. Bul úshin parlamentaralyq is-qimyl arnalarynyń aqparattaryn paidalaný aqylǵa qonymdy bolar edi. Ókinishke qarai Eýropa Parlamenti birqatar BAQ pen áleýmettik jelidegi jelsózderdi ǵana basshylyqqa alǵanǵa uqsaidy. Bir nárseniń basyn ashyp alý qajet. Qańtar dúrbeleńi kezinde beibit sherýge shyqqandar boldy. Bul daýsyz derek. Al ary qarai jaǵdaidy ýshyqtyryp, arandatý áreketterine barǵan búlikshil, buzaqy piǵyldaǵylar bolǵany da anyq. Jappai tonaýǵa, órteý men qiratýǵa kiriskender solar», - dedi ol.
Senator qazir elimizdegi quzyrly organdar bul oqiǵany túp-tamyryna deiin tekserip jatqanyna basa nazar aýdartady.
«Ekinshi másele. Oqiǵalar barysyna tereń saraptama júrgizetin bolsaq, beibit sherý qańtardyń alǵashqy kúnderi elimizdiń batys aimaǵynan bastalyp, eshqandai búlik bolmaǵanyn kóremiz. Tipti «Almaty tragediiasynan» keiin batys óńirde, Mańǵystaý jaqta sabaqty buta da synǵan joq. Eshteńe búlingen joq. Bilik tarapynan qandai da bir qatty qysym bolmaǵany belgili. Azamattardyń beibit sherýge shyǵý, óz talaptaryn bildirý quqyǵy saqtaldy. Sherýge shyqqandar gazdyń baǵasyn túsirý týraly talap etti. Bilik bul talapty oryndady. Memleket basshysy «barlyq talaptar eskeriledi, tiisti sheshimder qabyldanady» dep aitty. Artynsha Úkimet doǵarysqa ketti. Elde áleýmettik-ekonomikalyq naqty sharalar qabyldanatyny habarlandy», - dedi Nurtóre Júsip.
Alaida, ol Qazaqstanǵa qarsy agressiia jasaǵysy kelgender munymen qanaǵattanyp qalmaǵandyǵyn atap ótedi.
«Beibit sherýdiń artyn lańkestik áreketterge ulastyrýdy kózdep, bulǵaqty bastap jiberdi. Úshinshi kúshter el irgesin shaiqaýǵa umtyldy. Áýelgi áleýmettik-ekonomikalyq talaptar jaiyna qaldy. Elimizdiń birqatar aimaǵynda memlekettik mekemelerge, ákimshilikter men saýda ortalyqtaryna, dúkenderge qaraqshylyq shabýyl jasaldy. Jaǵdai shekten shyǵyp ketken soń quzyrly organdar halyqty qorǵaý úshin qarý qoldanýǵa májbúr boldy. Mundai jaǵdaida búlikshilermen kelissózge kelý múmkin bolmai qaldy. «Azattyqtyń altyn besigi» atanǵan Almatyny ot pen órtke orap, aiaýsyz qiratý oryn aldy.Basqa birqatar aimaqta bir ortalyqtan basqarylǵan búldirý áreketteri jalǵasty. Memleketimizdiń taǵdyry qyl ústinde turdy. Syrtqy kúshter jaǵdaidy óz maqsattaryna paidalanyp, Qazaqstandy otqa oraǵysy kelgenin kózi qaraqty adamdardyń bári kórdi. Sondyqtan azamattardyń beibit sherýge shyǵýyn shektep, quqyqtaryn buzdy degen aiyp tipten retsiz. Qazaqstan Respýblikasynyń basshylyǵy tapsyrǵan resmi tergep-tekserý nátijeleri jariialanǵanǵa deiin mundai qujatty qabyldaý da qisynsyz. Tergep-tekserý nátijeleri halyqaralyq qoǵamdastyqqa usynylatyn bolar. Sol kezde el de, álemdik qaýymdastyq ta aqiqatqa kóz jetkizetin bolady», - dedi Nurtóre Júsip.
