Qazaqstandyq rejisser ári akter, «Kelinka Sabina» filminiń avtory Nurtas Adambai AQSh-ta turyp jatqanyn rastady, dep habarlaidy Ult.kz.
Áleýmettik jelide aǵylshyn tili mektebiniń videosy tarady. Onda Nurtas Adambaidyń sońǵy alty aidan bir jylǵa deiingi ýaqyt aralyǵynda AQSh aýmaǵynda turaqty turyp jatqany aitylǵan. Videoda onyń aǵylshyn tilin úirenip, jańa ortaǵa beiimdelýge talpynyp júrgeni kórinedi.
Bul aqparat áleýmettik jeli qoldanýshylary arasynda qyzý talqylandy. Keibir jeli qoldanýshylary buǵan deiin Adambaidyń amerikalyq filmder men mýltfilmderge qatysty syni pikirler aitqanyn eske saldy.
Jýrnalist Mihail Kozachkov ta bul máselege pikir bildirip, rejisserdiń buryn AQSh-taǵy keibir kontentterdi synaǵanyn, al qazir sol elde turyp jatqanyn atap ótti. Sonymen qatar ol mundai jaǵdaidan qaishylyq kórmeitinin aityp, «heiterler – eń úlken jankúierler» degen pikir qaldyrdy.
Al Nurtas Adambai áleýmettik jelidegi jaǵymsyz pikirlerge jaýap berip, oqyrmandaryna arnap jazba jariialady.
«Men týraly teris pikir jazǵandardyń bárinen keshirim suraimyn. Senderge ashýlanǵanym, renjigenim, jaman oilaǵanym jáne jamandyq tilegenim úshin keshirim ótinemin. Bul – meniń aqymaqtyǵym. Basqalardy aiyptaityn, olar týraly jaman oilaityn adammyn. Osy qasietterimdi kórýge kómekteskenderińiz úshin raqmet. Meniń ózgelerdiń kemshiligin izdeitinimdi, olardy sóz etetinimdi, ózgeniń jetistigine qýana almaitynymdy, qyzǵanyshqa boi aldyratynymdy kórsetkenderińiz úshin alǵys aitamyn», – dep jazdy ol.
Ázirge rejisserdiń AQSh-ta qandai maqsatpen júrgeni jáne elge qashan oralatyny týraly naqty aqparat jariialanǵan joq. Alaida onyń shetelde turyp jatqany týraly málimdemesi áleýmettik jelilerde keńinen talqylanýda.
