Qazaqstannyń Tuńǵysh Prezidenti Nursultan Nazarbaevtyń tóraǵalyǵymen Qaýipsizdik Keńesiniń otyrysy ótti, dep habarlaidy "Ult aqparat" Elbasynyń resmi saityna silteme jasap.
Otyrysta óńirlik qaýipsizdiktiń jańa jaǵdailarynda ekstremizm men terrorizm qaterlerine qarsy is-qimyl máseleleri qaraldy.
Qaýipsizdik Keńesiniń Tóraǵasy Aýǵanstanda bolyp jatqan oqiǵalarǵa bailanysty bul máseleniń ózektiligi arta túskenin atap ótti.
Nursultan Nazarbaev Aýǵanstandaǵy jaǵdai búgingi tańda Ortalyq Eýraziia keńistigindegi mańyzdy ózgeristerge túrtki bolyp, uzaq merzimdi syn-qaterler týdyryp otyrǵanyn aitty. Osyǵan orai óńirlik qaýipsizdiktiń qazirgi tetikterin nyǵaityp, jańa mehanizmder qalyptastyrý kerektigine toqtaldy.
Qazaqstannyń Tuńǵysh Prezidenti ekstremizm men terrorizm kórinisterine qarsy jan-jaqty daiyndyqty qamtamasyz etý kerektigine nazar aýdardy.
– Óńirlik qaýipsizdikke tóngen jańa syn-qaterler qorǵanys qabiletin odan ári kúsheitý sharalaryn talap etip otyr. Qazaqstan armiiasy zamanaýi ozyq standarttarǵa sai bolýǵa tiis. Qarýly kúshterdiń jańǵyrýyn, qorǵanys ónerkásibi kesheniniń damýyn aiqyndaityn barlyq bazalyq qujattar bekitildi. Qazirgi tańda eń bastysy – biz qabyldaǵan sheshimderdiń bári durys oryndalýyn qamtamasyz etý, – dedi Qaýipsizdik Keńesiniń Tóraǵasy.
Sondai-aq, azamattardyń qaýipsizdigin arttyrý baǵytynda quqyq qorǵaý júiesinde júzege asyrylyp jatqan údemeli reformalardyń mańyzdylyǵy atap ótildi.
Elbasy qoǵamdaǵy tynyshtyq pen kelisim memlekettiń turaqty damýynyń negizi ekenine toqtalyp, ulttyq rýhani keńistigimizdiń qaýipsizdigin qorǵaý mańyzdy ekenin aitty.
Qaýipsizdik Keńesiniń Tóraǵasy memlekettiń turaqtylyǵynyń qoǵamdyq-saiasi jáne áleýmettik-ekonomikalyq bóligin únemi baqylaý qajet ekenin atap ótti.
– Azamattardyń naqty kirisin arttyrý, sapaly jumys oryndaryn ashý, shaǵyn jáne orta biznesti damytý, azyq-túlik qaýipsizdigin qamtamasyz etý, osynyń bárine ekonomikanyń ósimi arqyly qol jetkizemiz. Densaýlyq saqtaý men bilim berýdi qoldaý, azamattardyń ózekti máselelerin sheshý árdaiym memlekettik organdardyń basty nazarynda bolýǵa tiis. Munyń bári – qazaqstandyqtardyń áleýmettik ál-aýqaty men senimdiliginiń kepili. Ekstremizm men radikalizmniń óristeýine jol berýge bolmaidy, – dedi Qazaqstannyń Tuńǵysh Prezidenti.
Jiynda Premer-Ministrdiń orynbasary – Syrtqy ister ministri M.Tileýberdiniń, Ulttyq qaýipsizdik komitetiniń tóraǵasy K.Másimovtiń, Aqparat jáne qoǵamdyq damý ministri A.Balaevanyń baiandamalary tyńdaldy.
Otyrys qorytyndysy boiynsha Nursultan Nazarbaev óńirlik qaýipsizdik salasyndaǵy ulttyq múddemizdi qorǵaýǵa, azamattardyń qaýipsizdigin qamtamasyz etýge jáne qoǵamnyń ornyqty damýyna baǵyttalǵan birqatar naqty tapsyrma berdi.
