Beinekonferentsiia bailanysy rejiminde ótken Joǵary Eýraziialyq ekonomikalyq keńestiń otyrysynda Eýraziia ekonomikalyq odaǵy aiasyndaǵy yntymaqtastyqtyń negizgi máseleleri talqylandy, dep habarlaidy elbasy.kz.
2020 jylǵy atqarylǵan jumys qorytyndylanyp, orta merzimdi perspektivadaǵy mindetter qaraldy. Sondai-aq koronavirýs pandemiiasy jaǵdaiyndaǵy ózara integratsiialyq is-áreket týraly pikir almasyldy.
Joǵary Eýraziialyq ekonomikalyq keńestiń Qurmetti tóraǵasy birlesip jumys isteý arqyly Eýraziia ekonomikalyq odaǵy álemdik ekonomikada óz ornyn tapqanyn aitty.
– Koronavirýs pandemiiasynan týyndaǵan ekonomikalyq daǵdarys bizdiń integratsiialyq birlestigimiz úshin úlken synaq boldy. Qaýipsizdik máseleleri aldyńǵy qatarǵa shyqty, – dedi Elbasy.
Nursultan Nazarbaev jiynda azyq-túlik qaýipsizdigin qamtamasyz etý men áleýmettik infraqurylymdy damytý máselelerin kóterip, álemdik «jasyl» ekonomikanyń damý úrdisterine toqtaldy. Sonymen qatar Eýraziia ekonomikalyq odaǵynyń basqa integratsiialyq birlestiktermen, uiymdarmen ózara tiimdi yntymaqtastyǵy jáne júieli ekonomikalyq dialogty jalǵastyrýy mańyzdy ekenin atap ótti.
– Senimdi seriktestermen jáne odaqtastarmen birlesip qana elderimizdiń ekonomikalyq qaýipsizdigi men táýelsizdigin qamtamasyz etýge bolady. Eýraziia ekonomikalyq odaǵy qurylǵannan beri uiym músheleri eń kúrdeli jaǵdaida da ózara mámilege kelip, bir-birin qoldaityn seriktester ekenin kórsetti. Qazirgi jaǵdaiǵa bailanysty biz integratsiia men ózara túsinistikti budan da arttyra túsýimiz kerek, – dedi Joǵary Eýraziialyq ekonomikalyq keńestiń Qurmetti tóraǵasy.
