Elbasy Nursultan Nazarbaev Tashkentte Ortalyq Aziia memleket basshylary Konsýltativtik kezdesýinde birneshe usynys aitty, – dep habarlaidy QazAqparat.
Atap aitqanda, Elbasy «HHI ǵasyrdaǵy Ortalyq Aziiany damytý maqsatynda tatý kórshilik jáne yntymaqtastyq týraly shartty» bes jaqty formatta jasasýdy usyndy.
«Bul irgeli saiasi qujatta bizdiń ózara is-qimylymyzdyń negizgi qaǵidattary men maqsattary kórsetilýi kerek. Kelisimge sondai-aq elderimizdiń egemendigi, táýelsizdigi men aýmaqtyq tutastyǵyn ózara qurmetteý týraly erejeler enedi», - dedi Nursultan Nazarbaev.
Sonymen qatar, Elbasy aimaqtaǵy qaýipsizdikti nyǵaitý maqsatynda kelesi jyly Ortalyq Aziia elderiniń Qaýipsizdik Keńesi hatshylarynyń kezdesýin ótkizýdi usyndy.
Sondai-aq, kezdesýde Qazaqstannyń Tuńǵysh Prezidenti qatysýshy elderdiń úkimetterin demografiianyń joǵary dinamikasyna bailanysty problemalarǵa nazar aýdarýǵa shaqyrdy.
«Taýarlardyń, qyzmetterdiń jáne kapitaldyń qozǵalysyna shekteý qoiatyn kedergilerdi alyp tastaý arqyly kedergisiz Ortalyq Aziiany qurýǵa qol jetkizý kerek», - dedi Nursultan Nazarbaev.
Sonymen qatar, Elbasy barlyq memleket basshylaryn jańa mereke - 15 naýryzdy Ortalyq Aziia kúni retinde belgileýge shaqyrdy. Sondai-aq mádeni-gýmanitarlyq saladaǵy yntymaqtastyqty nyǵaitýǵa erekshe nazar aýdarylyp otyr. Máselen, osy baǵyt aiasynda Nursultan Nazarbaev Qazaqstannyń eń úzdik joǵary oqý oryndarynda bilim alý quqyǵyn bere otyryp, aimaqtyń ár elinen kelgen stýdentterge 10 grant bólýdi usyndy.
«Túrki áleminiń besigi - Túrkistan qalasy qaita túlei bastady. Sonymen birge ol óziniń mádeni, tarihi jáne rýhani ózegin saqtaityny sózsiz. Biz ony ortaq maqtanyshymyzǵa ainalatyn keremet megapolis qylamyz. Sondyqtan men Ortalyq Aziianyń baýyrlas memleketteriniń basshylaryn kelesi jyldyń kúzinde osy kóne qalaǵa shaqyramyn», - dedi Qazaqstannyń Tuńǵysh Prezidenti. Sóz sońynda Elbasy Ortalyq Aziia elderiniń muralaryn keńeitý jáne tereńdetý qajettigin aitty.
