Qazaqstan Prezidenti Nursultan Nazarbaev Tájikstan Respýblikasynyń Prezidenti Emomali Rahmonmen kezdesti, dep habarlaidy "Ult aqparat" Aqordaǵa silteme jasap.
Memleket basshysy biylǵy 28 qyrkúiekte ótetin TMD elderi basshylary keńesiniń otyrysyna qatysý úshin Dýshanbe qalasyna keldi.
Qazaqstan Prezidenti Tájikstan Respýblikasynyń Prezidenti Emomali Rahmonmen kezdesý ótkizdi.
Kezdesýde taraptar eki jaqty qatynastardyń qazirgi máselelerin jáne ekonomikanyń túrli sektorlaryndaǵy yntymaqtastyqty odan ári damytýdyń perspektivalaryn talqylady.
– Elderimiz arasynda ózara senimge negizdelgen qarym-qatynas ornady. Biz Tájikstanǵa árdaiym kómek kórsetip, qoldaý bildirdik. Búginde osy yntymaqtastyǵymyzdy tereńdetip, ózara saýda-sattyqty ilgeriletýdi kózdep otyrmyz, – dedi Memleket basshysy.
Sonymen qatar, Nursultan Nazarbaev TMD elderi arasyndaǵy bailanystardy odan ári nyǵaitý jáne integratsiialyq úderisterdi keńeitý úshin sharalar qabyldaýdyń mańyzdy ekenine nazar aýdardy.
Tájikstan Prezidenti eki el arasynda qalyptasqan qatynastardyń strategiialyq sipaty týraly aitty.
– Qazaqstan – Tájikstannyń negizgi strategiialyq jáne ekonomikalyq áriptesteriniń biri. Bizdiń saýda-ekonomikalyq qatynastarymyz keńeiip keledi, – dedi E.Rahmon.
Tájikstan Prezidenti Emomali Rahmon Nursultan Nazarbaevtyń halyqaralyq arenadaǵy bedelin erekshe atap ótip, ekonomikalyq jáne saiasi turǵydan qoldaý kórsetkeni úshin Qazaqstanǵa rizashylyq bildirdi.
