Elbasy Sultan Orazalinniń dúnieden ótýine bailanysty marqumnyń otbasy men týǵan-týystaryna kóńil aitý jedelhatyn joldady, dep habarlaidy "Ult aqparat" elbasy.kz-ke silteme jasap.
Qazaqstannyń Tuńǵysh Prezidenti belgili jazýshy, synshy, telejýrnalist, Qazaqstannyń eńbek sińirgen qairatkeri Sultan Orazalinniń dúnieden ótýine bailanysty aýyr qaiǵyǵa ortaqtasyp, kóńil aitty.
«Sultan Sháripuly búkil sanaly ǵumyryn ádebiet pen mádenietke, ásirese qazaq televiziiasy men radiosynyń órkendeýine arnady. Sonymen qatar egemendik jyldary birqatar jaýapty memlekettik qyzmetterdi de abyroimen atqaryp, qalamgerlik pen qairatkerliktiń tizginin teń ustaǵan talantty tulǵa, maitalman maman bolatyn. Onyń qoǵamdaǵy kókeikesti máselelerdi arqaý etip, áleýmettik astaryn asha bilgen aishyqty avtorlyq baǵdarlamalary men ádebi-mádeni habarlary, tanymdyq teleqoiylymdary, mazmundy kitaptary qashanda óz qundylyǵyn joǵaltpasy anyq», – delingen jedelhatta.
Elbasy sheber uiymdastyrýshy, suńǵyla suhbatshy retinde kópshiliktiń yqylasyna bólengen abzal azamattyń ǵibratty ǵumyry men jarqyn beinesi jurtshylyq jadynda árdaiym saqtalatynyna senim bildirdi.
