Maýsym aiynda Qazaqstan men Qytai basshylary kezdesedi. Bul týraly búgin Qytai Halyq Respýblikasynyń Qazaqstandaǵy Tótenshe jáne Ókiletti elshisi Chjan Hanxýei málimdedi, dep xabarlaidy QazAqparat tilshisi.
"Biyl biz birqatar mańyzdy oqiǵalarǵa kýá bolamyz. Menińshe, eń basty oqiǵa, ol - eki prezidentimizdiń Qytaidaǵy kezdesýi. Atalǵan kezdesý maýsym aiynda bolady. Budan bólek, Qazaqstan basshylyǵynyń basqa da ókilderin kútip otyrmyz. Olardyń ishinde Premer-Minitsr Baqytjan Saǵyntaev myrza, onyń orynbasary Asqar Mamin da bar. Bunyń barlyǵy Qazaqstan men Qytai arasyndaǵy tyǵyz qarym-qatynastyń joǵary dárejede ekenin kórsetse kerek", - dedi Ch.Hanxýei.
Elshiniń aitýynsha, eki eldiń "Bir jol, bir beldeý" bastamasy aiasyndaǵy yntymaqtastyǵy, sondai-aq, "Nurly jol" memlekettik baǵdarlamasyn atalǵan bastamamen sheber úndestire bilýdiń arqasynda biraz jetistikterge jetýge bolady.
"Qazaqstan men Qytaidyń yntymaqtastyǵy osy eki elge ǵana emes, jalpy aimaqtaǵy ózara áriptestik pen qaýipsizdiktiń damýyna oń yqpalyn tigize alady. Halyqtardyń ál-aýqaty artady", - dep atap kórsetti Ch.Hanxýei.
