Qazaqstannyń Tuńǵysh Prezidenti Resei Federatsiiasy Úkimetiniń tóraǵasy Mihail Mishýstinmen kezdesti, dep habarlaidy "Ult aqparat" elbasy.kz-ke silteme jasap.
Kezdesýde Nursultan Nazarbaev eki memleket arasyndaǵy yntymaqtastyqtyń joǵary deńgeiin atap ótti.
– Qazir biz kúrdeli kezeńdi ótkerip jatyrmyz. Qazaqstan men Resei koronavirýstyń taralýyna jáne onyń ekonomikaǵa tigizetin saldaryna bailanysty qiyndyqty birlese eńserýde. Jýyrda Vladimir Pýtinmen kezdesip, ózara keńestik. Jumysty ári qarai jalǵastyramyz, – dedi Elbasy.
Qazaqstannyń Tuńǵysh Prezidenti ekijaqty qatynastardy nyǵaitý jáne Eýraziia ekonomikalyq odaǵy aiasynda óńirlik yqpaldastyqty odan ári damytý máselelerine toqtaldy.
Mihail Mishýstin Nursultan Nazarbaevqa qonaqjailyǵy úshin rizashylyǵyn bildirip, Resei Federatsiiasy Prezidentiniń jyly lebizin jetkizdi.
Resei Federatsiiasy Úkimetiniń tóraǵasy Qazaqstanǵa sapary aiasynda júrgizgen kelissózder men kezdesýlerdiń nátijesi týraly aityp berdi.
– Biz ekijaqty kún tártibindegi máselelerdi jan-jaqty talqyladyq. Osy jyldyń birinshi jartysynda eki el arasyndaǵy taýar ainalymy 34 paiyzǵa óskenin atap ótken jón. Bul kórsetkish pandemiiaǵa deiingi deńgeiden 20 paiyzǵa artyq. Jyl sońyna deiin 20 milliard dollardan astam mejege qol jetkizgimiz kelip otyr, – dedi Mishýstin.
Resei Federatsiiasy Úkimetiniń tóraǵasy Qazaqstanda tsifrlandyrý salasynda qabyldanǵan sheshimderge qatysty pikirin bildirdi. Sondai-aq koronavirýs infektsiiasynyń taralýyna qarsy birlesken sharalardy júzege asyrý máselesine toqtaldy.
– Keshe «elektrondy úkimetke» arnalǵan ortalyqty araladym. Jumys óte tiimdi uiymdastyrylǵan. Sizder úshin de ashyq ekenimizdi aitqym keledi, bizdiń eshqandai qupiiamyz joq: Resei Úkimetiniń úilestirý ortalyǵynda atqarylǵan jumysty árdaiym kórsetip júrmiz. Biraq sizderdiń sońǵy zamanaýi jańalyqtardy jyldam engizip jatqandaryńyz meni tań qaldyrdy. Koronavirýsqa keler bolsaq, biz bul qaterli virýsqa qarsy kúreste qoldan kelgenniń bárin jasap jatyrmyz. Búginde «Sputnik V» vaktsinasy Qaraǵandy farmatsevtikalyq zaýytynda jasalady. Onyń 5 million dozadan astamy shyǵaryldy. Bul – úlken jumys. Qoryta aitqanda, biz baýyrlas tatý kórshilik qatynastardy joǵary baǵalaimyz. Aldaǵy ýaqytta da ekijaqty yntymaqtastyqty, sondai-aq Eýraziia ekonomikalyq odaǵy aiasyndaǵy qarym-qatynasty jan-jaqty damytqymyz keledi, – dedi Mishýstin.
