Búgin Aqordada Qazaq-Qyrǵyz shekarasyn shegendeý týraly shart rásimdeldi, dep habarlaidy QazAqparat.
Atap aitqanda, Qazaqstan Prezidenti Nursultan Nazarbaev pen Qyrǵyzstan Prezidenti Sooronbai Jeenbekov Memleket basshylarynyń birlesken málimdemesine jáne Qazaqstan Respýblikasy men Qyrǵyz Respýblikasy arasyndaǵy Qazaqstan-Qyrǵyz memlekettik shekarasyn shegendeý týraly shartqa qol qoidy.
«Búgin Qazaqstan-qyrǵyz yntymaqtastyǵyn odan ary nyǵaitýǵa baǵyttalǵan mańyzdy ekijaqty qujattarǵa qol qoiyldy. Ol memlekettik shekarany shegendeý týraly, sonymen qatar memlekettik shekara rejimi týraly kelisimder», - dep atap ótti qujattarǵa qoiý rásiminen keiingi birlesken málimdeme barysynda Qazaqstan Prezidenti.
Memleket basshysy shekarany shegendeý men memlekettik shekara rejimin engizý máselesi uzaq ýaqyttan sheshim tappai kelgenin aitty.
«Bul máseleni qolǵa alǵan Sooronbai Sháripulyna rizashylyǵymdy bildiremin jáne búgin biz qol qoidyq. Atalǵan qujattarǵa qol qoiý bizdiń shekaramyzdyń boiyndaǵy búkil memleketaralyq quqyqty rásimdeýdi aiaqtaidy», - dedi Nursultan Nazarbaev.
Óz kezeginde Qyrǵyz Prezidenti de tarihi qujatqa qol qoiylǵandyǵyn atap ótti.
«Biz eki eldiń arasyndaǵy memlekettik shekarany zańdy túrde rásimdeýdi aiaqtadyq. Qazaqstan men Qyrǵyzstan arasyndaǵy shekaranyń senim, tatý kórshilik jáne ózara tiimdi yntymaqtastyqtyń qaqpasyna ainalaryna senimdimin», - dedi Qyrǵyz Prezidenti.
Sonymen qatar QR UQK tóraǵasynyń orynbasary - Shekara qyzmetiniń direktory Darhan Dilmanov pen Qyrǵyz Memlekettik shekara qyzmetiniń tóraǵasy Ularbek Sharsheev Qazaqstan-Qyrǵyz memlekettik shekarasynyń rejimi týraly kelisimdi bekitti.
