Qazaqstan - yqpaldy óńirlik derjava. Bul týraly búgin Qytaiǵa memlekettik saparmen kelgen Qazaqstan Prezidenti Nursultan Nazarbaevpen keńeitilgen quramdaǵy kelissóz barysynda QHR Tóraǵasy Si Tszinpin aitty, dep habarlaidy QazAqparat tilshisi.
«Elderimiz arasyndaǵy diplomatiialyq qarym-qatynas ornaǵan sátten bastap joǵary deńgeidegi bailanystar ornap, saiasi ózara senim nyǵaia túsýde. Sonymen qatar «Bir beldeý, bir jol» jobasyn júzege asyrýdaǵy yntymaqtastyq ta tiimdi júzege asyrylyp, halyqaralyq arenadaǵy ózara is-qimyl da jandanyp otyr», - dedi kezdesý barysynda Si Tszinpin.
Si Tszinpin Qazaqstan men Qytai jan-jaqty strategiialyq yntymaqtastyqty jandandyrýǵa basa nazar aýdaratyndyǵyn atap ótti.
«Qazaqstan - bizdiń mańyzdy kórshimiz, sondai-aq yqpaldy óńirlik derjava. Bizdiń ekijaqty qarym-qatynasymyz dostas kórshiler arasyndaǵy qatynastyń úlgisine ainalyp otyr. Biz Qazaqstanmen adamzattyń ortaq taǵdyryn qurý jolynda alǵa qarai birge ilgerileýge daiynbyz», - dedi QHR Tóraǵasy.
Óz kezeginde Qazaqstan Prezidenti memlekettik saparmen kelýge shaqyryp, dostyq peiilmen qabyldap jatqan Qytai tarapyna rizashylyǵyn bildirdi.
«Osy múmkinshilikti paidalanyp, Búkilqytailyq halyq ókilderi jiynynyń naýryzdaǵy sessiiasynda joǵary memlekettik laýazymǵa qaita sailanýyńyzben jáne Qytai Kommýnistik partiiasynyń 19 sezin tabysty ótkizýińizben taǵy bir márte quttyqtaǵym keledi», - dedi Nursultan Nazarbaev.
Aita keteiik, Elbasy Nursultan Nazarbaev Qytaiǵa memlekettik sapary aiasynda 10 maýsym kúni Tsindao qalasynda ótetin Shanhai yntymaqtastyq uiymyna múshe memleketter basshylarynyń keńesine qatysady dep kútilýde.
