Astana-Dýshanbe baǵytynda tikelei áýe reisin ashý máselesi talqylanýda. Bul týraly búgin Tájikstan Prezidenti Emomali Rahmonmen kelissózderden keiingi birlesken málimdeme jasaý barysynda Qazaqstan Prezidenti Nursultan Nazarbaev aitty, - dep habarlaidy QazAqparat.
«Bizdiń kezdesýimizdiń aiasynda memleketaralyq qarym-qatynasqa, óńirlik jáne jahandyq kún tártibine qatysty problemalardyń barlyq spektorlary boiynsha pikir almasyldy. Saýda-ekonomikalyq yntymaqtastyqqa basa nazar aýdaryldy. Qazaqstan Tájikstan úshin iri eksporttyq seriktes sanalady. Biz úshin de Tájikstan mańyzdy saýda seriktes. Ótken jyldyń qorytyndysy boiynsha, ózara taýar ainalymynyń kólemi shamamen 800 mln dollarǵa jetip, bir jylda 30 paiyz ósim kórsetti. Álemdik ekonomikadaǵy aýmaly-tókpeli jaǵdaida bul óte jaqsy kórsetkish», - dep atap ótti Elbasy.
Qazaqstan Prezidenti tájik áriptesimen áli de bolsa eki eldiń arasynda paidalanylmaǵan áleýettiń mol ekendigin, taiaý ýaqytta taýar ainalymy kólemin tipti 2 mlrd dollarǵa da jetkizý jaiy talqylanǵanyn atap ótti. Sonymen qatar qazirgi ýaqytta Tájikstan, Ózbekstan, Qyrǵyzstan jáne Túrikmenstan elderimen óte baiypty kelissózder júrgizgenin aitty.
«Jabyq bolǵan temir, avtomobil joldary ashylyp, bizge barynsha qolaily jaǵdailar jasalýda. Tájikstanda jańǵaq, qara órik, anar pisti. Al bizde áli qar jatyr jáne biz atalǵan jańa pisken jemisterdiń sórelerimizde bolǵanyn qalaimyz. Kelissózder barasynda, jol kartasyn jasaýǵa ýaǵdalastyq, onda bul máseleni qalai júzege asyrý qajettigin atap ótetin bolamyz», - dedi Nursultan Nazarbaev.
Sonymen qatar Elbasy búginde Qazaqstanda qurastyrylǵan jeńil kólikter, temirjol lokomotivteri tájik naryǵyna shyqqanyn basa aitty.
«Sonymen qatar, ózara investitsiia sharttaryn, eki eldiń biznes kásiporyndarynyń qyzmetin odan ary jaqsartý sharttarynyń mańyzdylyǵy atap ótildi. Osy maqsatta elder arasynda iskerlik keńesin quryp, biznes forýmdar ótkizý, bailanystardy jolǵa qoiý múmkinshilikterin talqylady. Buǵan qosa, Qazaqstan tájik ekonomikasynyń iri investorlarynyń biri sanalady. Sońǵy -5-7 jylda 120 mln investitsiia quidy. Osy turǵyda biz Astana-Dýshanbe tikelei áýe reisin ashý máselesin qarastyrdyq», - dedi Qazaqstan Prezidenti.
