Nursultan Nazarbaev Mýzykalyq drama teatrdyń ashylý rásimine qatysty, dep habarlaidy Elbasy.kz saity.
Teatrda Qazaqstannyń Tuńǵysh Prezidenti túrki halyqtarynyń tarihy men ómirinen syr shertetin «Shańyraq» miniatiýrasyn tamashalady.
Kompozitsiialyq kórinisi men sáýlettik kelbeti ózgeshe teatrda tek qazaq akterleri ǵana emes, sheteldik tanymal óner qairatkerleri de óner kórsetpek. Tórt qabatty mádeniet ordasynyń kórermender zaly 510 adamǵa arnalǵan. Munda vestibiýldiń, kýlýarlardyń, foieniń, jinaqtaý holdary men VIP zaldar ulttyq naqyshpen bezendirilgen. Teatrda kórermenge jáne qyzmettik personalǵa shuǵyl meditsinalyq kómek kórsetetin dáriger de qarastyrylǵan.
Teatardyń bas direktory Ainur Kópbasarovanyń aitýynsha, 190 adam shtattyq rejimde jumys istei alady. Qazir akterlerdi jumysqa qabyldaý júrip jatyr. Olardyń qatarynda Dýbaida, Máskeýde tájiribe jinaǵan rejisserler men kompozitorlar, menedjerler bar.
«San ǵasyrlyq tarihy bar osyndai kieli ólkedegi óner ordasy Elbasynyń bastamasy, qoldaýymen salyndy. Bul óner ortalyǵynyń ereksheligi jáne kontseptsiiasy - preformativti teatr atanýynda. Iaǵni, qazaqstandyq qana emes, túrki álemine ortaq memleketterdiń akterleri de kelisimshart negizinde osynda jumys isteidi. Teatrǵa jas ballet trýppasy, hor, opera ártisteri, drama akterlerin kasting arqyly alyp jatyrmyz. 25 jasqa deiingi jas akterlerdi osynda úsh jylǵa oqytyp, túrli kýrstar, qoiylmdar arqyly sheberligin shyńdaimyz. Alys-jaqyn shetelden, respýblikanyń ár óńirinen talantty jas rejisserler, stsenograftar, horeograftar, akterlerdi jinap jatyrmyz. Talantty jastardyń ishinde «Belcanto» Vena akademiiasynyń túlegi Aiia Shárip, tanymal kompozitor Hamit Shanǵaliev, «Watanabe Buber» balet akademiiasyn, Vaganova atyndaǵy orys balet akademiiasyn bitirgen Mao Sakai syndy prima-balerinalarymyz bar. Teatrdyń alǵa qoiǵan jospary kóp», - deidi Ainur Kópbasarova.
Jańa ǵimarattyń jalpy aýdany 11 myń sharshy metrden asady. Teatr basshylyǵynyń málimetinshe, alǵashqy qoiylym 5 qyrkúiekte kórermen nazaryna usynylady. Oǵan deiin sahnany bezendirý, qajetti qural-jabdyqtarmen qamtamasyz etý jumystary júrgizilmek.
Sońynda Elbasy teatr ártisterimen sóilesti, Qurmetti qonaqtar kitabyna estelik jazba qaldyrdy. Sondai-aq BAQ ókilderi úshin brifing ótkizip, qala men óńirdiń negizgi damý nátijeleri týraly aitty.
– Túrkistan qazirgidei jańǵyrýdy buryn-sońdy basynan ótkizip kórgen emes. Tanymastai bolyp ózgerdi. Bul jer qazaqstandyqtar úshin ǵana emes, barlyq týrister úshin de biregei mekenge ainalady, – dedi Elbasy.
Qazaqstannyń Tuńǵysh Prezidenti investitsiialyq jáne týristik jobalardy, sondai-aq qalanyń jáne tutas óńirdiń turǵyn úi men áleýmettik infraqurylymyn damytýǵa baǵyttalǵan jobalardy odan ári júzege asyrýdyń mańyzdylyǵyn atap ótti.
– Qalada jańa jumys oryndary ashylýda, jastarǵa mol múmkindik jasalyp jatyr. Týrizm ýniversiteti boi kóterdi, búgin tamasha teatrdyń tusaýy kesildi. Bul - shyn mánisinde aitýly oqiǵa, – dedi Nursultan Nazarbaev.
