Ákimder men ministrler oryn alǵan problemalarǵa qatysty halyq aldyna shyǵyp, jaýap berýden qoryqpaýy kerek. Bul týraly «Nur Otan» partiiasy Saiasi keńesiniń keńeitilgen otyrysynda QR Tuńǵysh Prezidenti Nursultan Nazarbaev aitty, dep habarlaidy QazAqparat.
«Menińshe, oryn alyp otyrǵan problema jaiynda úndemei qalý – jumystyń eń nashar nusqasy. Adamdardan tyǵylmai mán-jaidy anyqtap, jaýapkershilikti moiynǵa alý kerek. Bizde halyqqa shyǵyp, bul suraqtarǵa jaýap berýden qoryqpaityn, problemalardy sheshetin ákimder de, ministrler de bar. Berdibek Máshbekuly (QR Úkimet basshysynyń orynbasary Saparbaev), vitse-premer bolyp taǵaiyndalýyńmen quttyqtaimyn. Baiaǵydan beri osy jer seniń ornyń edi. Tórt oblysta ákim boldyń. Sonyń bárin kórdiń. Bastaǵan kezde halyqtyń arasynda júrdik sol ýaqytta. Elmen sóilesip júrdik. Aitqanymyzdy el túsinip júrdi», - dedi Elbasy.
Nursultan Nazarbaev shaǵyn problemalardy jedel sheshý qajettigine nazar aýdardy.
«Adamdardy ómirindegi eń kishkentai máseleler tolǵandyrady. Máselen, sý joq. Bul ákim úshin deńgei emes qoi, iá? Sýmen ainalysýdyń qajeti qansha? Al adamdar úshin – bul ómiriniń máni. Aýylda jol joq. Bul ol úshin – ómiri, al bizder úshin – bolmashy nárse. Bizder jahandyq máselelerge qulash sermeimiz. Sondyqtan adamdarǵa jaqyn bolý kerek. Partiianyń qoǵamdyq qabyldaýlary jumys isteýi tiis», - dedi Tuńǵysh Prezident.
Sondai-aq, ol ákimder men ministrler partiiaǵa qatysy bar ekendigin pash etýi tiis ekenin eskertti.
«Munan da jamany - keibir memlekettik organdardyń basshylary, ministrler, ákimder ózin partiiamen birge ekendigin kórsetkisi kelmeidi. Partiia bylai, men bylai, ózime ózim osy jerde bastyqpyn. «Nur Otan-nyń» barlyq múshesi jariia túrde partiiaǵa qatysy bar ekendigin pash etýi tiis. Partiia tósbelgisin búgingi otyrysqa ǵana taǵyp kelmeý qajet», - dedi Nursultan Nazarbaev.
Osy rette QR Tuńǵysh Prezidenti Ońtústik Shyǵys Aziia elderiniń tájiribesin úlgi etti.
«Malaiziiada ministrler, Premer-Ministr, orynbasarlary, barlyǵy tósbelgi taǵyp júredi. Kóshede adamdar memlekettik qyzmetshi kele jatqanyn kóredi. Al biz she? Partiia múshesi ekendigimizden qorqamyz ba? Onda shyǵyńyzdar, basqasyn tańdap alamyz», - dedi Elbasy.
