Elimizde sońǵy bir jyl tehnogendi sipattaǵy synaqqa toly bolǵanyna qaramastan, kóptegen jumystar júieli túrde júrip jatyr. QR Prezidenti janyndaǵy Ortalyq kommýnikatsiialar qyzmetiniń direktory Talǵat Qaliev osyndai pikir bildirdi, dep habarlaidy QazAqparat tilshisi.
Onyń aitýynsha, kez kelgen másele boiynsha sheshimder naqty ári tez qabyldanady. Bul – Nursultan Nazarbaev qurǵan júie óz tiimdiligin kórsetip jatqanynyń belgisi.
«Bizge Elbasynyń rólin, onyń Qazaqstan tarihyna qosqan úlesin obektivti túrde baǵalaý qiyn. Bilikten óz erkimen bas tartý erlikti, sheshim qabyldai bilýdi talap etedi. Arada bir jyl ótkennen keiin munyń danalyqqa toly sheshim ekenin kórdik. Byltyrǵy 19 naýryz qazaqstandyqtardyń barlyǵy úshin kútpegen jaǵdai boldy dep oilaimyn. Degenmen bári konstitýtsiialyq jolmen boldy: sol kezdegi Senat spikeri Qasym-Jomart Toqaev Prezidenttiń mindetin atqarýshy boldy, sailaýǵa tústi. Búgingi tańda biz Nursultan Nazarbaevtyń qurǵan júiesi jaqsy jumys isteitinine kóz jetkizdik», - deidi ol.
T. Qaliev atap ótkendei, sońǵy bir jyl Arystaǵy tótenshe oqiǵa, Bek Air ushaǵynyń apaty, Qordaidaǵy jaǵdai, koronavirýs infektsiiasy siiaqty jahandyq jáne ekonomikalyq sipatqa ie synaqtarǵa toly boldy.
«Bizde berik júie jumys isteitinin kórip otyrmyz. Qandai jaǵdai bolǵanyna qaramastan memleket senimdi túrde jumys isteýde jáne sheshimder naqty ári jyldam qabyldanady. Demek, Nursultan Nazarbaev qurǵan júie nátijesin kórsetip jatyr. Adamnyń psihologiiasy sondai: ózimen zamandas danyshpandardy moiyndaýy óte qiyn. Olar úshin Abai, ál-Farabi, Sokrat pen Aristoteldi moiyndaý áldeqaida jeńil. Óz aramyzda erekshe tulǵa júrýi múmkin ekenin moiyndaý ońai emes. Menińshe, Nursultan Nazarbaevtyń baǵasyn keler urpaq beredi. On jyldyqtar ótken soń baǵalaýǵa bolatyn nátije ǵana qalady», - deidi spiker.
OKQ direktory Elbasy táýelsiz Qazaqstanda óshpes iz qaldyrǵanyn, sebebi ol egemen eldiń negizin qalaýshy ekenin aityp ótti.
«Nursultan Nazarbev bilikke elge qiyn kezeńde keldi. Qazir 90-jyldary jaǵdai qalai bolǵanyn ekiniń biri bile bermeidi. Keńes odaǵy qulaǵan kezde elimizdi jumyssyzdyq, senimsizdik, qylmys jailady. Adamdar óz máselesin quqyq qorǵaý organdaryna júginý arqyly emes, «banditter» arqyly sheshti. Sol kezeńde olardy teledidardan kórsetip, suhbat alyp, bedeldi adam sanady. Kóp adam el bolashaǵyna kúmánmen qaraǵan ýaqytta memleket basqaryp, institýttar qurý ońai emes edi. Elbasy eldi jappai daǵdarys kezeńinen alyp shyqty. Bastapqy on jylda ol turǵyn úi-kommýnaldyq sharýashylyq, zeinetaqy júiesi, áleýmettik qamtamasyz etý júiesinde sheshýshi reformalar qabyldady. Muny bzdiń tájiribemizdi sarapqa salý úshin keletin reseilikter de moiyndady. Qazirgi ýaqytta elimiz jańa syn-qater yqpalynda tur. Búgingi tańda import, eksport aǵyny bolmaidy: óz elimizdi óz betimizben qamtamasyz etýimizge týra keledi. Esterińizde bolsa, bir jyl buryn «Qarapaiym zattar ekonomikasyn» Nursultan Nazarbaev bastaǵan. Endi ony tolyq meńgerýimiz kerek. Bul halyq úshin óte kerek dúnie. Qazirgi ýaqytta bizdiń halqymyz úshin turaqtylyq óte mańyzdy», - deidi Talǵat Qaliev.
Onyń sózinshe, QR Tuńǵysh Prezidenti kadr daiarlaý máselesine de árqashan kóp kóńil bóldi.
«Mysaly, «Bolashaq» baǵdarlamasy boiynsha 12 myń adam oqydy. Búgingi tańda olar Memleket basshysy Qasym-Jomart Toqaevpen birigip, bilik júiesin jańartýda. Qazrgi ýaqytta jastar kadr rezervi qalyptasty, olar derbes jumys istei alatyndaryn kórsete alady dep oilaimyn», - deidi saiasattanýshy.
.jpeg)