Elbasy Nursultan Nazarbaev otandyq BAQ ókilderine bergen suhbaty barysynda elimizdiń qai óńirinde týrizm qarqyndy damytylatyndyǵyn aitty, dep habarlaidy QazAqparat tilshisi.
«Týrizm dúniedegi ekonomikanyń úlken salasynyń biri. Dúniejúzi ekonomikasynyń 10 paiyzy týrizmde jatyr. Al, bizde onsha damymaǵan. Endi qolǵa alynyp jatyr. Biyl eldiń bári kórsin dep, ádeii Alakólge bardym. Adamdar óte kóp, salynyp jatqan 4-5 juldyzdy bir-eki qonaq úi bar. Týrizm bolýy úshin aldymen jol kerek. Almatydan Taldyqorǵan arqyly Alakólge deiin jol bar. Sol arqyly halyqtyń barlyǵy baryp jatyr», - dedi N.Nazarbaev.
Sonymen qatar Memleket basshysy Balqash kóli elimizdiń dál ortalyǵynda ornalasqanyn jáne onyń Ystyqkólden esh kem emestigin atap ótti.
«Biraq, infraqurylymy joq. Oǵan qonaq úi salyndy. Munan keiin, Almaty oblysy týrizm úshin tartymdy. Túrkistanda da týrizm úshin qonaq úiler salyp jatyrmyz. Áýejaiy, joldary jóndeletin bolsa, el barady. Kókshetaýda «bes juldyzdy» bir qonaq úi bar. Kottedjder salynýda. Reseiden de adamdar kóp keledi. Soltústik Qazaqstanda Shalqar-Imantaý degen kól bar. Ol Býrabaidan da ádemi», - dedi Elbasy.
Nursultan Nazarbaev Aqtaýda Túrkiiadan kem emes demalys oryndaryn salýǵa bolatyndyǵyn da basa aitty.
«Kaspiide sýǵa shomylý maýsymy 4-5 aiǵa sozylady. Mundai Túrkiiada da joq. Ystyqkólde bir ai ǵana. Qazir Aqtaýda áýejai da bar. Qalany áýejaiǵa qarai ósiretin bolamyz, jańa qala salynady. Jaǵalaýynyń barlyǵy el demalatyn jerler, qonaq úiler, kottedjder bolady. Oǵan týristik jaǵynan qaraǵan emespiz. Sebebi jol bolǵan joq. Qazir mine, Astanadan barlyq jaqqa - ońtústikke, soltústikke, shyǵysqa, batysqa salyp jatyrmyz. Qazir týrizmdi damytatyn 10 nysan tańdap aldyq, onyń ishinde Aqtaý, Almaty, Kaspiidiń jaǵalaýy, Ońtústik Qazaqstan, Baianaýyl bar», - dedi Nursultan Nazarbaev.
