QR Prezidenti Nursultan Nazarbaev el ekonomikasynyń damýy týraly aitty, dep habarlaidy QazAqparat tilshisi.
«Syrtqy faktorlarǵa qaramastan, 4 protsent kóleminde turaqty ósý úrdisi saqtalyp otyr. Qazaqstan jańa jaǵdaiǵa beiimdelip, dáiekti reformalardy júrgizýdi jalǵastyryp keledi. Zamanaýi talaptarǵa sai bolý úshin tsifrlandyrý jáne adami kapital sapasyn arttyrýǵa baǵyttalǵan memlekettik jobalar júzege asyrylýda. Osyǵan orai, elimizde qolaily investitsiialyq ahýal qalyptasyp, sheteldik ozyq tehnologiialar men kapitaldy tartý kózdelip otyr», - dedi N.Nazarbaev búgin elshilerdiń senim gramotalaryn tapsyrý rásiminde.
Prezidenttiń aitýynsha, búginde Qazaqstan kórshiler eldermen, sondai-aq Eýropa men Aziia arasyndaǵy naryqtyq qatynastardy jandandyrýǵa qajetti zamanaýi infraqurylym qalyptastyrdy.
«Atap aitqanda, «Batys Qytai - Batys Eýropa» halyqaralyq avtokólik dáliziniń 3 myń shaqyrymǵa jaqyn qazaqstandyq bóliginiń qurylysy aiaqtaldy. Jaqynda Aqtaý qalasynda ótken 5-shi Kaspii sammitinde Kaspii tóńireginde bes eldiń quqyqtyq mártebesi týraly konventsiiaǵa qol qoiyldy. Konventsiiada qaýipsizdik pen ekologiia máselelerimen qatar Kaspii mańy elderiniń kólik infraqurylymyn damytý, tranzittik áleýetin arttyrý qarastyrylǵan. Jańadan salynǵan Quryq porty arqyly transkaspii baǵyttaǵy júk tasymaldarynyń tiimdi logistikasy qalyptasady. Qazirdiń ózinde Qazaqstannyń ónimderi álemniń 120 eline jetkizilip otyr» , - dep atap kórsetti Memleket basshysy.
Aita keteiik, búgin Aqordada Ýkraina, Livan, Braziliia, Germaniia men Pákistan elshileri QR Prezidentine senim gramotalaryn tapsyrdy.
.jpeg)